Sunday, July 15, 2012

Artiste Interviews with Mandy Wong

July 15, 2012
胡杏兒爆黃智雯遊戲情關

女人的終身事業,莫過於找到一張長期飯票!與男友黃宗澤感情穩定、獨欠一紙婚書的胡杏兒,亦望好姊妹黃智雯(Mandy)能找到幸福,故不介意擔起媒人婆角色,杏兒踢爆Mandy甚受異性歡迎,指她只愛遊戲人間,感情事僅屬次要,Mandy聞言辯稱自己用情專一,兼喜歡「熟男」!

面對前輩緊張

黃: 黃智雯
胡: 胡杏兒

胡:2009年拍《巴不得爸爸》你做我細妹,印象係好乖、好靚同清純,好多新人講唔到對白,唔識做表情、緊張、唔畀心機,你就冇呢啲問題,做到角色要求,傻傻哋得嚟又有喜劇細胞。

黃:我不知幾緊張,第一套算多戲嘅劇。

胡:你第一套劇係咩?

黃:《東山飄與西關情》,《巴》劇係第三部。

胡:不過識你之後覺得你好noisy!

黃:初時識你唔敢出聲,你係大前輩,你坐喺張櫈度令我好緊張囉。

胡:我不知幾nice。

薯片攻略

黃:咁又係,成日買chips畀我哋食。

胡:因為我要整肥你哋,講真我覺得好多新人冇天分,唔識點做。我初初入行都好緊張,又成日垂低頭,試過畀導演鬧添。但你冇呢啲問題,後來先知原來你演藝出身,應該係有幫助。

黃:咁對手都好緊要,《巴》劇算係我第一部可以輕鬆去享受角色嘅劇。

埋堆組三八會

胡:你記唔記得第一次見到我係點?

黃:覺得呢個女仔好濃妝囉!以前細細個睇你啲劇,最鍾意《衝上雲霄》,啲人成日話你cool,其實都唔係,反而令我呢啲後輩感染到你份熱情,好舒服,好有姊妹feel。

胡:因為你傻嘅囉!大家都好快混熟、好夾,我喺圈內唔係好多知心友,除咗你係仲有胡定欣、陳敏之,大家間唔中有聯絡。

黃:你攞視后之後不斷去內地掘金,好難聯絡,惟有用微信聯繫咋。

乘機偷師

胡:後尾我同你、胡蓓蔚、姚子羚、胡定欣設咗三八會,本來諗住每個月食一次飯,但我比較busy,你呢啲後起之秀又追得咁急,所以咁耐以嚟都係食得一次。

黃:哈哈!雖然你成日唔喺香港,我都不時問你意見。

胡:我都開心你信任我,記得你拍《On Call 36小時》有啲問題搵我傾,都幾warm,我都有睇《缺宅男女》,見你可以冇包袱咁演,同埋講對白好快囉!

黃:你講對白都好快又清楚,所以向你學習,我做新人時,有問題會問你,你又解答到,無聊到着衫問題都會問你意見。後尾拍戲壓力大試過唔開心,第一個諗起你,約你出嚟問意見。

胡:你上年係熱門「飛躍」獎候選之一,其實我支持你嘅,攞獎指日可待。

恨識熟男筍盤

黃:拍《怒火街頭》嗰時,成日得我哋兩個,我同你會講男仔經,仲成日叫你介紹男仔我識,你話如果搵到結婚對象,記得要畀你過目先。

胡:係呀!之前傳你同羅仲謙都會八卦吓,好似真係有啲嘢,不過你話冇咪信你囉,我覺得你幾受男仔歡迎,公司都有個PA幾鍾意你。

黃:唔好意思,我係好多個PA嘅女神。不過你快啲介紹個我識啦!

胡:你呢啲射手座嘅人係好鍾意遊戲人間,唔係好嚮往拍拖。

黃:係鍾意玩,但我鍾意成熟型男士,你話識好多做律師、醫生朋友嘅?

胡:係都留番畀自己啦!

黃:你仲要揀咩?

胡:不過你會hurt仔,玩兩玩就唔要。

黃:我好專一o架!

胡:好啦!有好嘢留畀你。其實我同你有啲似,都係事業型,唔算超級大美女,你可塑性高,見到你好似見到自己咁,你又做師奶、乖乖女、傻妹咁,希望可以再嘗試其他唔同角色,因為同一image好悶,一年拍三、四部差唔多會想死。我睇好你今年攞「飛躍」,《缺宅男女》嘅關二嫂咁犀利,做戲放已經成功咗一半。

黃:點可以再做好啲?

易上難keep

胡:有前輩同我講上位易、keep住難,我都經歷咗好多先行到今日,開始已經有好多機會,去到中間都會有樽頸位,做過好多角色後又開始重複,觀眾開始去挑剔瑕疵,所以你要有心理準備。

黃:我之前兩套劇角色都唔討好,試過畀人人身攻擊,好多負能量。

胡:我都係超級勁負面,大家case唔同,你係因為角色,人哋憎你即係你做得好,但要聽意見再檢討,到你做到話你唔好嘅人都讚你,咁就冇人可以打敗你。

黃:都幾難!我覺得你EQ勁高,但演技唔係逼就出到。

胡:我都經過好幾年先諗通,同埋有劉松仁同陳錦鴻兩個前輩教我好多,所以遇到前輩不妨問多啲。《流金歲月》嗰時太多人讚,自己都會飄飄然,覺得唔係好難啫,但冇人話我知之後條路仲難。

黃:同你傾偈真係獲益良多!

後記:吵耳女人

Mandy、胡杏兒外表斯文,原來兩個女人碰上都可以吵耳非常,訪問期間她倆不時開懷大笑,對話內容還夾雜不少有S尾音的英文,例如「oks」、「hellos」、「byes」等,聽落奇怪,她倆卻講得順口。Mandy自爆這些奇特英文乃她帶頭講起,久而久之更感染了身邊朋友,杏兒便是其一,說到這「鬼主意」,Mandy傻氣地說:「我覺得好得意囉!」

071512_01
杏兒與智雯感情要好,經常互訴心事。

071512_02
胡杏兒自覺與黃智雯都是事業型,看到她好像見到當年的自己。

071512_03

071512_04
胡杏兒與黃宗澤已十分穩定,有「筍盤」她會介紹給黃智雯。

071512_05

--------------------

July 29, 2012
羅仲謙激嬲黃智雯尋開心

「關二嫂」黃智雯(Mandy)與羅仲謙雖然曾經傳緋聞,但私下確實Friend過打Band,面對性格慢熱的Mandy,謙仔最愛挑戰其底線,出盡力捉弄兼挖苦,直至Mandy擺出一副嬲怒樣,謙仔才會自得其樂,一臉滿足地收手,難得伊人不計前嫌全數收下,所以說,好朋友也要一凹一凸才能成事!

緋聞男女互相挖苦

M︰黃智雯
H︰羅仲謙

H︰你根本就唔想畀我知,其實係偷望緊我,唔係點知我Body好呢!我真係好鍾意取笑你,你成日懵吓懵吓,基本嘢都唔識,好似插蘇點插都唔會識。

M︰女仔就係要等人照顧,我扮唔識啫!咁點解你要操42吋胸肌?由瘦削仔變大隻仔?

H︰睇得西方電影多,覺得男仔演技外,身形都好緊要,好想模仿,所以拍《搜》劇時開始操,德哥畀兩種運動揀,我揀有得騷body嘅打拳。

M︰之後轉埋型?

H︰套劇出後大家buy,訪問都要除衫,所以keep住呢副身形,咁吸唔吸引到你?

M︰你好少喺我面前除衫,唔得啦!因為你個胸大過我,戴10個bra都唔得,但又唔鍾意好瘦削,有少少肉地都好,當係咕(o臣)!不過你都有優點,係體貼同細心,同你做拍檔係幾享受。

H︰我知我把口好衰,又成日蝦你。

M︰係啦!我唔知點解會受,又唔會還擊。

H︰因為我一啖沙糖一啖屎。

M︰呢個都係追女一個招數。

H︰我有追過你咩?

M︰冇呀!即係話可以用喺追女仔度,我夠冇話鍾意你,自作多情、口花花。

H︰所以咪累到你囉!13個緋聞女友有你,好在大家唔介懷。

M︰其實如果我想深入去了解一個男仔,我係被動同慢熱,但一熟咩都同你講。

H︰嗰時你就係想深入認識我。

M︰點解?唔好作個故事出嚟!

H︰哈哈!所以我鍾意你有被虐囉,挖苦你嗰時,你一嬲我就好開心,因為知你嬲就係嗰刻,之後又冇嘢。

揀女友要思想成熟

M︰某程度我幾了解你,處女座男仔幾保護自己,表面好似好多嘢講,但又好驚人見到你最入面。

H︰所以同你唔好太friend,要避忌少少,費事第時有咩事累到你就唔好,咁之前我發生事有冇人打畀你?

M︰基本上你有咩事,啲人都會即刻打畀我。問題係我以後仲要搵對象o架!講到擇偶條件,我覺得年紀唔係咁緊要,主要係take care到我,思想成熟嘅男仔。

H︰你對住情人係小女人,好遷就得人,又襟鬧。我細個拍拖會諗對方高度,依家要思想成熟,相處舒服,有共同理念,最重要係陪你過埋呢一生。

演情侶獻螢幕初吻

H︰當年同你拍劇集《搜下留情》認識,我覺得你戲內戲外好唔同,戲入面好笨,收工就靚靚女咁,呢樣最深刻,你螢幕初吻仲畀咗我,而且主動錫我添!

M︰對你第一個印象係死o靚仔,但相處落原來都幾紳士。

H︰套劇係大家事業轉捩點,大隻仔同鵪鶉妹。

M︰做惡霸二嫂之前,啲人都冇忘記鵪鶉妹。

H︰之後同你都有緣分,部部劇都遇到你,咩關係、情侶都做過,連監製都唔知我哋做咗幾多次情侶。

M︰套劇開頭以為唔使錫你。

H︰開頭你唔肯添!到說服咗你先肯。

M︰人哋係鵪鶉妹,點會主動錫男仔,其實好樂意畀個螢幕初吻你,但如果唔使當然最好啦!

H︰可能你畀人感覺係主動少少,但會有啲收埋自己情感,要同人撻着先得,係慢熱嗰種。

M︰《搜》劇時以為大家唔係好出聲,但你竟然喺架Van仔度撩我講嘢。

H︰你夠唔似得依家咁Mandy,我仲係謙仔,出咗名講嘢都大聲啲。記唔記得《搜》劇我成日赤膊,問你做咩唔望我?

M︰當時心諗「做乜啫,你覺得自己好型咩?」

後記︰碰面嘈爆似街市

鏡頭前的Mandy較寡言,但私底下卻喋喋不休說不停,還不時夾雜着英文,十足傻大姐般,就如訪問當天,面對羅仲謙講到眉飛色舞,她卻找不到位置插嘴,接着把心一橫向謙仔重複說︰「ask me questions!你有冇咁多嘢講吖!」不過謙仔卻睬你都傻,還繼續發揮挖苦精神︰「你成日將句說話不斷重複,好嘈呀!」兩人你一言我一語,誰也不肯讓步,令餐廳頓時變成街市般「熱鬧」!

072912_01
曾經傳緋聞的羅仲謙及黃智雯,私底下原來相當老友。

072912_02
羅仲謙最愛挖苦黃智雯,笑言一見對方嬲就很開心。

072912_03
黃智雯的螢幕初吻,就這樣獻了給羅仲謙。

072912_04
黃智雯大讚羅仲謙體貼細心,並相當享受與他合作拍劇。

072912_05
羅仲謙身形fit爆,難怪經常在鏡頭前騷肌。

072912_06

--------------------

August 5, 2012
智雯求子珊催旺桃花

黃智雯(Mandy)與徐子珊這對「哎吔姊妹」,一個性格男仔頭,一個被標籤為性感icon,身為妹妹的Mandy向家姐子珊取經,望吸納更多異性緣,然而於子珊眼中,卻認為這些外觀及緋聞均是負累,反之做回真我更有吸引力!演齡尚淺的Mandy,透露角色有時難抽離,與對手戲中戲外關係易混淆!

黃:黃智雯
徐:徐子珊

黃:我記得我參選港姐嗰年,係你同阿哥(林峯)做表演嘉賓,當時我好enjoy,因為有好多舞跳,好似參加一個舞台劇咁,同埋覺得你哋跳舞好叻,十分婀娜多姿好性感,露晒腰咁,其實見你真人之前,喺你參選時已經留意你,你嗰屆有好多人跳舞,不過你好標青,所以話學過跳舞參選係有幫助,對成件事有信心,覺得你會贏。

徐:對你有印象係睇《巴不得爸爸》,覺得你幾有energy,新人演戲要到位又唔搶戲係幾難,不過你就拿捏得好好,我唔係睇咗好多集,但覺得呢個女仔幾decent,幾有potential,咁你仲好young ,我入行都25歲啦!

黃:我24歲先選港姐,都入咗行4年幾。

徐:你pick up得好快,仲有好多時間,睇好你!

保持真我 自然吸引

黃:家姐你可唔可以教我點先可以吸納到異性緣?

徐:個人要decent,行出嚟先舒服,冇緋聞唔重要,反而有係包袱,唔知我係樣衰定咩,任何人同我拍都中,可能性格問題,本身唔鍾意扮靚,同男仔會有話題啲,可能會令身邊人誤會,我覺得some how係有少少負累,人哋只記得你啲緋聞,focus唔到演咩角色最好囉!

黃:咁冇緋聞亦有好處,我性格都係同男仔易friend,有啲女仔比較嗲,我就係又爽又傻,同男仔會搭晒膊頭,但我唔會易惹呢啲囉!可以focus做戲。

徐:你睇我今時今日,人哋唔會覺得我喺度做緊戲!

黃:咁有時你拍緊劇,因為某啲緋聞令傳媒追訪你,某程度上都會影響自己心情,拍嘢又分心。

徐:我都係易分心,所以唔係好恨異性緣。

黃:係恨真命天子!

徐:我咁嘅年紀仲坐喺度同你傾偈,你仲同我講呢啲嘢?你點覺得我好有異性緣先?

黃:我係女仔都覺得你有一雙電眼,何況係男仔呢?男仔睇女仔多數會睇樣同身材,好明顯一定係會吸引多啲男仔先。

徐:你唔好唔記得我拍《學警》時剷青喎!咁即係點呀,言下之意即係想有多啲人追?做自己囉!係好娘,但it's true,每個人最吸引係好nature做緊自己,姑勿論人哋認唔認同,有啲人覺得扮晒嘢,我成日都有negative commend,覺得我唔係做緊自己,我同你哋私下相處係做緊自己,不過同唔熟人相處唔會展現,正常人會保護自己啦!
角色混淆 難分真假

徐:喺外觀上,我day 1唔aware,但當有10個人同你講,就發現呢樣嘢原來等同於性感,其實我唔buy,有少少難接受,都唔希望外觀會影響將來老公純粹睇呢樣,有危險性,反而希望對方係真正了解我個人係點。

黃:即係你覺得一個decent男仔,會識得點樣入手?

徐:我唔prefer對方鍾意我個劇邊個角色,因為咁只係鍾意你個角色,可能唔係鍾意你,有混淆囉!

黃:係咪覺得呢樣嘢係做呢行好大障礙?

徐:係,幾危險,好難解決,所以都係靠直覺。

黃:基本上我入行後冇咩機會識到圈外人。

徐:會唔會揀圈內人?

黃:以前一定唔會,依家愈來愈覺得唔到自己揀,但有時會覺得,遇到個圈內男仔會睇唔得清呢個人,其實係做緊戲定係做緊自己,所以好難去放開自己,會諗係咪要嘗試畀對方了解自己呢?但另方面又會覺得圈內人好唔可靠,好假,分唔清,可能大家拍同一套劇,但又追緊你。

徐:當然,I agree!你知道仲慘,可能演緊戲,但用同一方法去追囉!

黃:可能佢代入角色啫!

徐:好易混淆!你有冇混淆過?

黃:……冇喎!

徐:我見到你眼神有猶疑。

黃:如果太清醒好難去投入拍情侶囉!拍完都有段時間唔慣,一個星期左右。

徐:咁就唔得啦!應該完晒廠得番幾日外景就close啦!

舞林高手 自小學藝

黃:我知道你都鍾意跳舞!

徐:4歲阿媽就帶我去跳ballet,後來因為屋企唔再畀錢,我就去考scholarship,結果10幾歲就轉跳hip hop jazz。

黃:我細個阿媽唔畀我跳,逼我學琴,到5、6年級正式學後來仲好努力考入演藝,但當由興趣變成主修科時又好大壓力,開始成日唔開心,之後轉咗讀戲劇。

徐:我跳咁多年舞都係表演冇比過賽,因為唔鍾意,以前教跳舞都係齋搵錢,享受唔到。

黃:我每年都去英國跳舞,好欣賞外國人無論老幼一齊同課室跳,大家唔介意你跟唔跟到,所以好享受。

080512_01
黃智雯(右)自言性格又傻又爽,要向緋聞女王徐子珊學習如何吸引異性。

080512_02
子珊認為緋聞太多反成負累,令工作分心。

080512_03
Mandy與徐子珊這對「哎吔姊妹」,除了傾工作還會互訴心事。

080512_04
徐子珊和黃智雯熱愛舞蹈,有機會亦切磋一番。

080512_05

080512_06
演齡尚淺的Mandy有時會把持不住,對角色和現實出現混淆。

080512_07
徐子珊、黃智雯同樣獲得家人愛錫及支持。

080512_08

--------------------

August 12, 2012
馬國明唔候擒追女要夾

被喻為城中筍盤的無綫小生馬國明,對愛情可謂相當執着,既不相信一見鍾情,亦抗拒齋睇外表,直言會從性格及相處方面入手,一切由朋友關係演變。而黃智雯亦贊同雙方溝通最重要,雖然經歷過愛情失敗,但伊人仍未氣餒,揚言有信心會找到一個心靈上滿足到她的另一半!

黃:黃智雯
馬:馬國明

馬:識你之前覺得你好斯文,因為港姐有光環箍住,美貌與智慧並重,但識落之後覺得以你性格,點會揀去選港姐,而唔係直接讀訓練班。

黃:播《衝上雲霄》時我做緊空姐,有少少迷戀你,入行之後逐一同劇中演員合作好開心,同你合作之前覺得你好寡言,識咗之後原來你幾口花花,但整體嚟講都好隨和同冇架子,畀我感覺你係好願意同新人,或者同你唔同輩分嘅人share自己經驗,好舒服。

馬:演戲方面,覺得你係多面化,外形着數,唔局限小家璧玉,做八婆都得,公司好多花旦因為外形、聲線局限咗。

黃:咁同你都係合作過《On Call 36小時》,有冇咩難忘事?

口花花冇被投訴

馬:你錫我囉!記得當日你好緊張,可能你比較少喺鏡頭前錫男仔啦,所以我就盡量令氣氛輕鬆啲,講冷笑話,仲話錫多幾次就好嘞!

黃:都唔係好緊張,係驚,因為要主動,你啲fans聲勢浩蕩,驚佢哋憎恨我,平時我唔會主動錫男仔,但劇入面就要對你同袁偉豪主動,嗰刻要說服自己先。

馬:我覺得你錫袁偉豪自然啲,可能係拍我先啦,有經驗pick up得快啲。

黃:點解你個個劇都撩女仔?

馬:想令對方輕鬆啲啫!之前同賈曉晨拍《飛虎》,佢好緊張,衫又sexy,惟有氹吓佢。

黃:如果你想追一個女演員時咁點?人哋會唔信你囉,你對個個都係咁。

馬:咁呢啲會feel到嘅,憑住認真嘅眼神,女仔好敏感,不過我咁耐冇畀人投訴過。

曾遭人哋粉絲「問候」

黃:不如講吓演戲心得啦,我覺得你咩角色都handle到,乖仔同反派都OK,我演嘅角色都好大range,拍嗰排仲會入咗戲幾個月添,你會唔會?

馬:我都會,但冇試過出唔到嚟,演技好多嘢係鋪出嚟,演員冇一個特定形象係最着數,當你冇枷鎖時就咩都做到,所以我唔介意人哋點睇我。

黃:有冇試過畀人用難聽說話鬧過?

馬:梗係有,出道時畀人粗口問候,可能佢係第二個人嘅fans就攻擊我,但我又好淡然,笑一笑就算,每個演員都會畀人鬧,影帝都畀人鬧,所以唔好對外間評語太上心。

黃:咁你真係要教吓我,之前二嫂同《on call》時都好多負面聲音,開頭會唔慣同唔開心,覺得係鬧緊自己,但後來因為套劇轉變,觀眾又會好鍾意你,所以我覺得有時唔睇啲評語仲好。

馬:當笑話去睇,要豁達,演員係有好多附帶嘢,收得呢份人工就包埋,畀人鬧或者畀傳媒追訪,幾好形象都會有人唔鍾意你啦!如果抵受唔住就倒不如轉行。

和平分手 未嘗愛情最痛

黃:以前點追女仔?

馬:態度凝聚對方會知,都冇咩招數,幾boring,每次女友都係自然由朋友開始,好少好激烈一見鍾情嗰啲,起碼了解一段時間先,唔齋睇樣,都會從對方性格同相處開始,夾唔夾好緊要,靚都會對得厭o架!

黃:用咩手法追先?

馬:開始咪行街、睇戲同食飯囉,傾吓偈了解吓,我唔介意出街畀人見,識朋友梗係會去街,唔通第一日就叫人返屋企咩,你都好驚啦。

黃:之後又點呢?

馬:好自然發生,拖佢隻手囉!本身我唔鍾意熱鬧,女仔同我一齊,我會鍾意喺屋企,過往女友有部分係得,有啲就好堅持,小事可以互相遷就,大事就要方向一致,我絕對唔大男人。

黃:你係女人湯圓。

馬:第一次有人咁讚我。

黃:女人湯圓有好多講法,有人用口或者色誘,你係好順得人意,有次同你食飯,你話鍾意女仔多嘢講。

馬:大家都啞好大鑊,通常另一半多嘢講過我。

黃:你怕唔怕女仔好嘈?

馬:睇咩程度,我有時鍾意靜,女仔要就一就。

黃:我呢方面都好犀利,好順得人意,識睇眉頭眼額,以前好難由朋友開始,依家慢慢接受,了解過覺得OK,眼緣都好緊要,默契慢慢培養。

馬:我未試過有一段好痛嘅感情,分手都係和平,拍拖總有鬧交時,最激都唔會打女人,一唔妥就唔會出聲,我一句起兩句止,表達不滿就會唔出聲,冷靜幾耐唔知,可以好耐,但都會主動氹番對方,除非件事好離譜啦。

黃:呢啲咪好囉,識得顧全大局,以前有冇試過追女仔失敗?

馬:通常追唔到就唔會追。

黃:點解?你係筍盤嚟o架!

馬:自己會知,有啲男仔咩類型都追,我唔係囉!有時都驚,筍盤係人哋客氣先咁講。

黃:我好健康,都冇受過情傷。

馬:拍過拖未o架?傳來傳去都係羅仲謙!

黃:out咗10年啦!我都有經歷過一段感情o架。

馬:幾多年前?

黃:入咗行,其實每段感情都有得着,嗰次係兩個人喺唔同位置上,有人會問我揀男友圈內定圈外,根本冇得講,要夾到,以前男友好滿足到我,當我係公主,但睇番轉頭,原來我係鍾意多溝通,當兩個人傾唔到內心嘢,心靈上滿足唔到就好難走落去,不過唔知點解都拍咗4年。

後記

黃智雯與馬國明,一個性格樂天、一個寡言,理應交流不來,沒想到碰在一起時,卻出奇地有化學作用。拍照當天,智雯經常撩馬國明玩,又扮親嘴又大擺古靈精怪甫士,未幾已把悶蛋馬國明融化,結果訪問時,馬國明頓時變成開籠雀般,表現鮮有風趣的一面,所以智雯應記一功!

081212_01
黃智雯唔介意被城中筍盤馬國明箍實。

081212_02
雖只合作過一個劇,馬國明與黃智雯玩起來十足大細路。

081212_03
馬國明這個chok look都好煞食o架!

081212_04
馬國明被黃智雯感化,鬥擺趣怪甫士。

081212_05
馬國明扮cute,黃智雯卻手托香腮。

*Credits to orientaldaily

No comments:

Post a Comment