馬德鐘論盡四大花旦
--------------------
August 29, 2012
馬德鐘：阿佘點攰都唔殘
馬德鐘曾被指桃花旺盛，的確他入行至今總是緋聞不絕，幾乎合作過的女星都無一幸免。當然時間可證明一切，很多所謂的緋聞女友其實是他好友。由他論盡她們，當然最為貼切！
好多人都話我有個花名叫「花旦殺手」，其實陳豪都有呢個名o架！哈哈！講真，喺呢行只有兩樣嘢傳，一就係緋聞，二就係不和，咁我就好少同人傳不和嘅，咁咪傳緋聞囉！
蔡少芬善解人意
我 合作過嘅女演員都好多，例如有張可頤、宣萱、蔡少芬、佘詩曼、郭羨妮、陳慧珊等。講吓蔡少芬，佢係一個好好嘅學習對象，因為佢對人真係好好，令到身邊嘅人 好舒服，因為我自己本身係巨蟹座同埋做過警察，所以防衞性好高，所以呢行都冇乜朋友，係佢令我覺得其實都可以放開自己。
我仲記得有一次開早返廠拍劇，嗰時我住喺元朗，但唔知醒，當時我同佢拍緊劇，咁我咪即刻打畀佢，話自己唔知醒，依家飛車入嚟，蔡少芬聽到即刻話：「你千祈唔好飛車，我慢慢化妝拖住先。」臨收線仲問我食咗早餐未，佢就係一個咁好嘅人！
至 於阿佘，我同佢都拍過好幾套劇，第一套應該係2001年嘅《酒是故鄉醇》。啲人話佢成日放電電人，我自己同佢相處淨係覺得一樣嘢，佢好犀利，佢係唯一一個 我見過捱更抵夜、日夜顛倒但個樣係冇變冇殘嘅女演員！有時連續拍通宵，佢話好眼瞓，但佢個樣真係好精神，我諗佢應該係天生麗質，哈哈！
仲有阿佘嘅EQ係非常之高，脾氣好好，有時佢聽到啲唔係咁好嘅說話只會笑一笑，聽完就算，你唔會見到佢嬲，呢個係佢畀我一個好深刻嘅印象。而郭羨妮就係一個好吃得苦頭嘅人，嗰陣我哋喺內地拍劇幾個月，上面環境好辛苦，但佢一啲怨言都冇，性格相當硬朗。
視陳慧珊做前輩
拍 《衝上雲霄》做我老婆嘅陳慧珊，其實嚴格嚟講係我前輩。嗰陣時佢已經好紅，佢都有教我好多嘢。我記得拍《衝》劇第一場戲都幾親熱，佢話唔使介意，就將隻手 搭過嚟，咁我就放心。其實有時候拍親熱戲，男演員仲唔自然過女演員，始終男仔怕被人誤會，好似佢咁放，就會令你拍得好放心。
*Credits to the-sun and orientaldaily
No comments:
Post a Comment