June 3, 2012
「花王」歐陽震華：宣萱最惡死
歐陽震華（Bobby）從視卅年演過無數劇集，帶給觀眾無限歡樂，是觀眾的開心果，雖然他的身形一日一日「長大」，但合作的花旦卻愈來愈年輕，近日甚至跟年輕廿三年的鍾嘉欣搭檔，實在令人妒忌，Bobby卻一於懶理，繼續肩負栽培花旦的偉大使命！Bobby將於一連五天，剖白卅年演藝工作的心路歷程，如何從訓練班一個墊底生，憑努力蛻變成獨當一面的小生兼坐上「視帝」寶座。
我拍過無數劇集，襯過無數花旦，仲愈襯愈後生，的確令人羨慕，但最特別是從無緋聞，可能一直以來，我身邊都有女朋友，結婚之後又有老婆，全世界都知，加上紀錄良好，所以跟我合作的女演員都好放心。
講到年紀最輕的女拍檔，可說是《耀舞長安》的鍾嘉欣，雖然年齡相差一大截，但全無代溝，可能她早熟，而我又遲熟，嘉欣是個好純但好玩的細路女，所以合作好愉快。好似跟她拍一場床上戲，講述她被灌迷湯呻吟除衫，事前她問我應該如何演繹，從未試過醉酒嘅佢唔知點呻吟，我就教她將「二」字用普通話叫出來，估不到她又叫得幾好聽，結果一take過搞掂。除了嘉欣，不知何解同我合作的女藝員都是惡女，可能我太百厭，不夠惡實在治不到我！
冇人敢郁張櫈
最惡的一定是宣萱，我夠膽這樣講全因宣萱最講得笑，佢惡到全城皆知。拍攝《施公奇案》時，每個演員都有張開工櫈，為了貪方便，收工都會將櫈放在電視城一個公眾地方，第二天開工隨便攞一張櫈用。我的開工櫈好新淨，試過有七日唔使開工，我唔想張櫈畀人攞去用，宣萱就提議：「你寫我個名啦，實冇人敢掂！」我就搵張紙寫上宣萱個名，畫了個骷髏骨頭，下面再加兩條骨打交叉，結果一個星期後，張櫈真係原封不動，我攞起張櫈，仲成個「烘」喺度，證明冇人敢移張櫈，宣萱張櫈都敢郁？真係未死過咩！哈……。
講句公道話，其實宣萱唔係惡，佢係個好有原則的人，她的開工櫈絕對不會借人坐，她認為櫈係好私人的物品，想坐櫈就要自己帶，咁佢又真係冇錯。
濕到冇bra戴
宣萱係個好玩得的人，跟她拍《美味天王》，有場戲係我同鄧一君用杯水去整醒暈了的宣萱，我提議用口含水噴醒佢先夠過癮，宣萱話冇問題，我心想既然咁爽就做盡啲，先用杯水追住佢來噴，再在梳化底收埋盆水，宣萱見勢色唔對拔足而逃，我將成盆水淋去佢背脊，佢全身濕晒，場戲出來效果好好。宣萱完全冇嬲，佢去服裝間時話我：「你要淋就早啲講嘛，我冇帶定多個『爸爸』（bra）呀，依家濕晒點算呀！」係宣萱先可以咁玩，大家好似一家人咁，玩完又唔會嬲。
關詠荷「爆房」
其實我最想為宣萱找個男朋友，可惜我身邊的男人都結晒婚，叫佢等吓啦，睇吓邊個離婚，好多人以為宣萱是愛狗狂，總之男人鍾意狗就一定得，但係全部跌晒眼鏡，連之前個獸醫男友都搞佢唔掂，我諗馴獸師先搞得佢掂，攞住條皮鞭來對付佢！
其次最惡的就是關詠荷，佢真係唔講得笑，得張家輝先搞得掂佢，其他人真係去送死。拍《四大才子》時，有次家輝同佢拍同一場戲，當時佢哋住埋一齊，家輝一早就點關詠荷返去電視城梳頭先，話跟住會返去，到佢整完個古裝頭，PA（助導）竟然話家輝病咗冧廠，我見關詠荷氣沖沖走去攞車，當時唔知發生咩事，夜晚返到錄影廠見到家輝，佢話你知唔知我今朝幾大鑊呀？關詠荷好嬲衝返屋企嘭一聲踢開道房門，再一手拉開張被，當時天寒地凍o架，關詠荷大叫：「死佬，連我都點！」真係咁都得，佢兩個天生一對，無人可以取代。
Profile
姓名：歐陽震華（Bobby）
年齡：50歲
威水史：1982年加入無綫電視藝員訓練班，由跑龍套到配角至漸被睇重，90年代初在《壹號皇庭》中擔正男主角。1997年與拍檔關詠荷憑《醉打金枝》於萬千星輝賀台慶奪「最佳惹笑冤家大獎」，又在2000年憑《洗冤錄》在萬千星輝頒獎典禮中奪「最佳男主角 」，事業更上一層樓。
宣萱讚Bobby合作最安心
宣萱不介意被Bobby視為最惡的女藝員，直言視他這位好友為最愛拍檔，跟他一起開工的日子最開心，更大讚Bobby是圈中難得的好男人及正人君子，絕對不會對女藝人不正經，跟他合作最安心，圈中誘惑雖大，但Bobby從不受引誘，令宣萱至為欣賞。
Bobby張櫈寫上宣萱個名，一個星期都冇人敢郁。
「有次同Bobby有場咀戲，拍之前佢喺導演身邊兜咗十個圈，不停游說導演取消咀戲，最後導演都取消咗。睇到Bobby轉嚟轉去真係好好笑，我都未嫌棄佢，佢竟然唔肯同我咀。」宣萱說。兩人合作多次，始終無緣一咀。
至於YoYo（蒙嘉慧）亦大讚Bobby是好拍檔，開工從無悶場，有一次Bobby執到她的車匙，打算整蠱她，半夜收工後堅持陪她去攞車，一心諗住她找不到車匙就會發癲，殊不知YoYo不慌不忙從袋中取出車匙，Bobby吃驚不已，取出拾得的車匙反問：「咁呢條車匙係邊個o架？」原來YoYo曾跟方中信合作拍劇，為了不讓她早走將其車匙扣起，自此YoYo必備兩條車匙開工，估不到可以反過來整蠱Bobby，她笑說：「真係要多謝方中信。」
愈拍愈young
外表肥嘟嘟好可愛的Bobby，合作對手從未受年齡限制，近年對手更愈拍愈嫩口，同樣受到觀眾歡迎。
90年代
Bobby90年代活躍電視圈，1991年與陳秀雯拍攝《壹號皇庭》，1996年跟陳妙瑛拍《天降財神》，1997年與關詠荷合拍《醉打金枝》及《美味天王》，1999年與宣萱合拍《洗冤錄》，對手皆是好戲之人，劇集一出，收視必高企。
千禧年代
踏入千禧年，Bobby除了與關詠荷繼續合作，亦加入多位新血，如2001年跟蔡少芬合作《陀槍師姐III》，2003年跟佘詩曼拍攝《洗冤錄II》，2004年與蒙嘉慧拍《陀槍師姐IV》等。
拍新花旦
近年無綫力捧新進花旦如鍾嘉欣、楊怡，Bobby亦以前輩老師身份教她們演戲，2006年分別跟鍾嘉欣拍《法證先鋒》及與楊怡拍《賭場風雲》，最近再與鍾嘉欣合作《耀舞長安》，更有不俗口碑。
蒙嘉慧open試咀「壓驚」
Bobby演技了得，原來死穴是拍接吻戲，所以採取避得就避之法。
以我嘅輪廓，扁口扁面，好似鹹煎餅咁壓埋一堆，拍kiss戲有咩好睇？你估係陶大宇咩，佢鼻高、下巴兜兜、皮膚又好，側面錫落去幾好睇，睇佢跟陳慧珊、宣萱拍接吻戲真係揮灑自如。到我同蔡少芬（Ada）拍《陀槍師姐》醉住擁吻戲，結果我同Ada錫完面珠、額頭，再攬埋就完成，表現出情到濃時嘅感覺就得，唔一定要激吻，導演都冇符。
蒙嘉慧與Bobby試咀，十分開放。
不過之後同蒙嘉慧（YoYo）拍接吻戲，先知道原來kiss戲可以綵排嘅！嗰次喺尖沙咀當街當巷拍咀戲，拍之前我緊張到騰來騰去，又飲水又食香口膠，YoYo走埋來撩我：「好緊張呀？口臭咩？食咁多香口膠，見你咁驚，都冇乜人啫，想唔想試吓？」kiss戲都有得試？通常呢啲戲唔會綵排，正式埋位先咀落去。好！我又試吓，佢錫落來，問我係咪好啲，我話好啲，佢仲問我仲使唔使試多次。通常拍完男藝人會懶有風度同女藝人講唔該晒，點知一拍完，我講唔該，佢竟然講thank you，邊有女仔咁講o架，佢真係冇得頂。
後尾拍《耀舞長安》YoYo喺化妝間見到我就說：「唉！做女人真係慘，以前你就襯我，過幾年已經襯胡杏兒同鍾嘉欣。」我即刻話：「係呀，遲幾年你做我後母添！」激死佢。
--------------------
June 4, 2012
歐陽震華：畀人勸做幕後
Bobby表示訓練班路難行，初入行因無錢使而去當舖變賣奢侈品。
歐陽震華（Bobby）從影卅年，由一九八二年入讀無綫第十一期藝員訓練班，自認是訓練班最醜樣一個，眼見梁朝偉、張兆輝、關禮傑全部出道，自己竟然被勸轉做幕後，心情簡直跌落谷底。
選擇讀無綫藝員訓練班純粹是覺得做明星好威，同班有湯鎮宗、梁朝偉、關禮傑、張兆輝、吳廷燁、吳鎮宇等。我在訓練班入面是最醜樣一個，當時偷睇老師寫評語，梁朝偉及湯鎮宗等評語是「一級小生」，吳廷燁「武打小生」，「歐陽震華」？咦，空咗嘅！無評語，唉！一盆冷水照頭淋。
後來導師問我有無興趣轉幕後，隔兩個星期再問有無興趣做體育組記者，我讀藝員訓練班喎，唔係想做記者，諗住無人簽，但好彩簽到最後一個都簽到我，好似是有人唔簽先簽我，雖然做後備，但都諗住船到橋頭自然直。
Bobby（左起）與關禮傑、張兆輝曾合演《黃金十年》。
Bobby指DoDo姐為人體貼，拍劇時曾陪他對戲，令他十分感動。
梁朝偉在訓練班的評語是「一級小生」，相反Bobby則無評語。
等錢使去當舖
入無綫前打份工每月七、八千元，又不用養家，連打火機都用名牌，但第一年入無綫，就將之前買落的奢侈品逐樣賣，但朋友唔要，又無錢使，就搵朋友幫手去當舖。那時雖然銀包無錢，但都好開心，覺得畢業又可以成為發哥接班人，以為捱完訓練班就得，點知原來是噩夢的開始。
訓練班出來條路都好難行，眼見個個都做主角，《黃金十年》我同張兆輝、關禮傑三個，一睇就覺得張兆輝是男主角，我就配角樣，演技又差，但都算有人識，搭地 鐵聽到人講「呢個司徒咩華呢，一行出嚟就死嗰個茄喱啡……」當時仲拖住女朋友，後來咪買架二手車，但架車霉到穿窿。之後攞架車去賣，當時為揸車無餐食得 飽。
四巨星陪對戲
之後拍《警花出更》，遇上鄭裕玲、劉兆銘、白茵與石修四個天王巨星，有得震無得瞓，畀人鬧到飛起，當時返去背劇本到滾瓜爛熟，到正式埋位監製突然改 對白，吓！入晒腦，臨時改了做唔到，監製叫放消夜，話等Bobby讀熟先拍，但DoDo姐好好，叫PA買消夜返廠，四個巨星陪我對戲，其他人以為DoDo 姐好嚴肅，其實佢都有體貼一面，當時真係好感動。
--------------------
June 5, 2012
歐陽震華：可惜無髮配合
Bobby寧願留短髮，都唔想以九一分界見人。
歐陽震華（Bobby）出道之後一直浮浮沉沉，直到九二年《壹號皇庭》，才真正有機會坐上一線小生位置，Bobby好希望可以原班人馬開拍第六輯，不過頭髮短小的他，慨嘆：「無『髮』配合！」
最記得第一次同《壹號皇庭》監製鄧特希見面，阿希話好想開法庭戲，但亦都好冒險，因為法庭戲好沉悶，好少觀眾鍾意睇，所以好靠一班演員。阿希刻意找全部二線演員作良性競爭，我、陳秀雯、陶大宇、宣萱、陳慧珊、駱應鈞等，要我哋做好自己本分，每人都係主線有得發揮，結果拍了咁多集，差不多個個都上晒一線。
讚陳秀雯轉數高
好多觀眾好喜歡我同陳秀雯飾演兩夫妻的一段戲。秀雯轉數好高，好似我哋經常要拍床上傾偈戲，兩個都穿着絲質滑脫脫睡衣，我個角色又衰，講嘢鹹鹹濕濕，萬一有咩反應咪好醜？雖然大家冚住被，但睇到兩個人形分開就不好，秀雯諗到個好辦法，叫道具手足攞了張最厚棉胎來，我問佢：「做咩，唔夠暖咩？」原來佢係想用棉胎捲實我，捲到上心口，上面再冚住被，大家對腳碰埋就唔會尷尬，所以每次拍床上戲我都要做豬腸粉。
其實由第一輯《壹號皇庭》到現在，不知不覺已經廿年，我好想開拍第六輯，我知道觀眾都好想，如果唔係點會每次重播都咁大回響，所以好想重組番這個組合，觀眾都大有眼福，但大家的髮型就點都去唔番以前，就係大宇都去唔番啦，唔好話我呀。
九一分界唔使諗
雖然我頭髮唔多，但無論如何都不會戴假髮，實畀人掟雞蛋，我都接受唔到。其實光頭有光頭靚仔，你睇球星施丹都多人鍾意，做娛樂圈是演員，觀眾如果鍾意睇人多頭髮，咪揀多頭髮的演員嚟睇，總有觀眾唔介意人哋少頭髮，況且我依家又唔係地中海，只是頭髮有些稀疏，咁咪全部剪短晒去，唔通玩九一分界咩，我就不如死咗去，就算剷光佢都不會梳九一分界。
--------------------
June 6, 2012
歐陽震華：我真係咁搞笑
歐陽震華希望自己的搞笑演出能令觀眾減壓。
歐陽震華（Bobby）與周星馳有甚麼分別？星爺戲裏笑死冇命賠，戲外卻是個不苟言笑的人；Bobby則完全相反，徹頭徹尾都是人肉笑彈。為甚麼性格如此樂觀？他一語道破：「自己都唔笑，屈埋屈埋咪病囉！」笑一笑，世界更美妙！
我有個朋友識好多喜劇演員，佢話喜劇演員本身一啲都唔好笑，個個嚴肅到不得了，佢問我點解歐陽震華可以咁好笑，做戲好笑，本身都好搞笑。我就答佢我真係咁搞笑！如果成日淨係識得氹人笑，自己都唔笑，屈埋屈埋咪病囉！
捨棄熱鬧甘平淡
好似《壹號皇庭》「余在春」個角色咁，唔係佢似我，係我似佢。個角色幾好玩，對白又啜核，真係好適合我做。其實我以前都唔係咁好笑，拍完《壹》劇後就好似開咗竅咁，個人愈嚟愈識得放鬆同開朗咗，講笑都認真啦！以前有咩自己諗掂佢，依家就算唔搵人傾，咪出去飲吓嘢嘻哈大笑，等個腦放鬆吓。
依家遇到唔開心一定搵朋友訴苦，但朋友愈來愈少，幾千變幾百。人大咗，性格都開始變。以前鍾意四圍湊熱鬧，反而依家少少怕多人。以前蒲中環酒吧好多人，唔識嘅膊頭黐膊頭都傾一晚；依家要有間隔，傾都要搵個熟嘅。呢行抑鬱症多，我依家咁都可能係一種先兆嚟，以前喺Disco嘈到要傾唇語玩骰盅，依家唔可以音樂大聲過我。
美國有調查報告話做喜劇演員長命過做悲劇演員，我依家唔理做咩角色都好，都會滲喜劇元素落去，令人輕鬆吓。成日乸住塊面，石膏像咩？某類觀眾希望輕鬆，食飯都想開心。講真，我都想做動作演員，冇人搵之嘛！其實我好靈活，早前飾演上海民初探長揸電單車，冇人信我郁得。
最怕吊高驚到縮
但我最驚係高同吊威吔，《談判專家》同《陀槍師姐》都試過，七、八樓咁高，嗰條鋼絲牙籤咁，話斷就斷。吊過嗰次之後唔吊得威吔，亦唔落得水，真係好驚！八樓放你落去，用跳樓速度，叫你大啲動作，唔得呀，所有器官都縮啦！
--------------------
June 7, 2012
Bobby牙擦擦：咪堅囉！
歐陽震華寄語新人要裝備自己，上位要靠實力。
歐陽震華（Bobby）老早已返大陸拍劇，令不少演員羨慕不已，都說各有前因，他今天積來的果是昨天種的，他寄語後輩簡單一句：「唔好畀香港生活環境寵壞。」有現在的成績，全靠默默耕耘，他還豪氣的說，沒擦鞋沒送袋照攞視帝，這才夠「堅」。
內地嘅夏天，任何地方都係大火爐，只要你開工，時裝都死！唔好話黐晒頭套，舊年八、九月喺大陸拍鍾馗，工作人員話如果唔係就我，四月已經開鏡。有一次熱到爆咗鬚，全部汗嚟，拍到咁熱好忟囉！
早年已北上賺人仔的Bobby，適應力極強。
Bobby也想多拍港劇，可是檔期不能遷就。
內地拍嘢，要入鄉隨俗。香港人樣樣轉得好快，可能同香港人合作多，內地劇組都有過之而無不及。佢哋基本上唔知我講乜，叫佢加啲想像力，我都唔知佢哋講乜o架，睇埋眼神、身體語言估到囉，上去拍嘢唔好諗住好似香港咁乜都有，但呢啲地方只要有連鎖快餐店就唔使死。
上位靠實力其實
內地愈來愈進步，愈來愈文明。有時去應酬，明知人有企圖咪唔去，唔逼得我，我唔係飲得好勁，係飲唔飲嘅問題，佢哋唔會逼，好文明，邊個敢隊我呀，未死過咩，我覺得依家內地人仲有禮貌過香港人囉！
Bobby笑言老婆大使，所以要勤力做。
我依家少拍香港嘢，想抖一抖，唔係怕辛苦，只係啲期唔啱，我係一個勤力嘅人，老婆都問我點解咁勤力？我話你大使嘛！好多觀眾叫我拍番多啲香港劇，但依家咁多新人，真係好多選擇。依家個個都有經理人，真係好幸福，但要上位真係好講實力，好似我咁冇擦鞋冇送袋，都攞到視帝，咪堅囉！就算返內地都適應到，能屈能伸，唔好畀香港生活環境寵壞。
做個好榜樣
你問我會唔會退休？做乜要退，難得搵到份工自己鍾意又搵到錢，都會一直做落去。新一脫嘅演員都叫我Bobby哥，所以要做榜樣，唔可以失禮，以前Bobby仔可以錯，依家我要提醒番人唔可以錯，不過我都揀人提，試過畀人窒番轉頭，你話乜世界？（完）
後記
Bobby是個真性情流露的人，跟他做訪問實在是一大樂事，難怪他如此得人歡心。Bobby現在最大心願就是希望原班人馬開拍《壹號皇庭》第六輯，因為拍攝該劇是他演藝生涯最快樂的日子，所以Bobby承諾如果能夠開拍得成，他願意減收酬勞，Bobby說：「就算唔知開唔開得成，都想約出嚟傾吓聚吓，咁多年冇見，一定好開心。」希望Bobby這個「皇庭夢」能夠早日實現。
*Credits to orientaldaily
No comments:
Post a Comment