Oriental Daily Interview with Michael Tao, Bobby Au Yeung & Felix Lok

Bobby爆大宇用褲菲女嘲small

駱應鈞（左起）、陶大宇與歐陽震華相交廿多年，笑料一籮籮。

Bobby將絲巾縛在頭上，認真鬼馬。

大宇拍咀戲，經驗豐富。

阿公家有私人健身室，保持fit爆身形。

大宇和Bobby鬥爆瘀事，嗒落有味。

過百集的經典劇《壹號皇庭》，造就了陶大宇、歐陽震華（Bobby）和駱應鈞（阿公）成為老友，三人重聚暢談當年軼事，笑料百出。堪稱「笑料貨櫃」的Bobby大爆大宇當街甩褲，更被菲傭取笑「small」！大宇卻反嘲對方當街PK，二人加埋近百歲還樂此不疲，最老正的阿公坦言三人聚首是何等難得和極具紀念性。

陶：我幫你哋諗好形象，三人行埋都有不一樣嘅感覺……

Bobby：你就話打Bow連戲，但我就再搵唔到從前嘅髮型！我個頭仲年復年變圓，遲啲要倒吊瞓，等面皮唔好鬆……哈哈！

阿公：《皇庭》至今已經廿年，我哋再一齊坐埋，認真難得，好值得紀念！以前拍劇就專飛紙仔，不過我依家就轉咗新公司（CTI），公司規定唔可以飛紙仔！

咀陳慧珊唔停口

Bobby：其實觀眾鍾意睇我哋幾兄弟嘅屋企戲，但我就鍾意睇大宇嘅kiss戲！佢同陳慧珊、宣萱拍咀戲，嘩……拍到「施施SirSir」，放消夜、收機仲喺度緊！

陶：又唔係我要求，不過通常對手都對我好好，陳慧珊嗰次仲係「螢幕初吻」！

阿公：佢哋個個鬼妹仔性格都好主動，你同陳慧珊嗰場，真係好正！

陶：你又知正？係正都只有我知……哈哈！

Bobby：講到拍咀戲，我遇上關詠荷，嗰次咀戲我真係學到嘢！自己拍咀戲怕醜又「蛇Ger」，點知當日我同佢拍咀戲時，佢竟然拍攝中途講嘢……叫我面口唔好疊住佢，鏡頭後我仲怪佢唔投入，後來佢話邊講邊咀會好逼真，果然拍出嚟又真係好有效果！唔信嘅話，大宇你試吓！

陶：唔會啦……到咗呢個階段，我已經唔敢喺鏡頭前錫女仔，早晨一個輕吻還可以，要談戀愛式激吻，嘩……好核突！

Bobby：我試過同蔡少芬有一場激吻戲，好驚……你話好似大宇有輪廓下巴兜兜拍咀戲就話好睇，我呢啲扁口扁面，一撞埋乜嘢眼、耳、口、鼻都唔見晒啦，所以我想到一個辦法同少芬講：「到時我錫吓你塊面，再唔係錫埋你額頭就夠！」佢竟然答我：「唉喲……我都係咁諗！」頂……

阿公fit過羅仲謙

陶：阿公拍差人戲都好辛苦，拍查案走勻全港，不過阿公生活好有規律，當年我去佢屋企，已經見佢有私人健身室，依家身形仲係Keep得咁fit，比羅仲謙更好！

阿公：當年拍一場查案戲可以拍十一、二日，當年後生，不過依家我都有保持運動量，幕前都要見得人o架！

陶：其實我哋個個都貪靚，拍《皇庭》時我要求場場換衫，要唔同顏色，所有Bow都係私伙！

Bobby：你（指大宇）連睡衣都要全白絲綢，着到好似「白龍王」咁！有一次外景喺街邊換衫大出洋相……當日係星期日，喺皇后像廣場取景，我同你攞住戲服，本來想行過去酒店換，但又想快，索性喺外景車旁換，點知你解開褲頭，竟忘記個銀包袋咗喺後袋，結果墜甩咗條褲，成條褲跌到落腳眼呀，現場大群菲傭見到呢個露底場面不禁大叫：「oh！Michael…… small！」我睇到反白眼！我只好話：「下次勤啲換底褲啦！褲頭橡筋都變成波浪紋啦！」哈哈哈哈……

陶：你夠因為戴黑超，喺商場睇唔到路，行扶手電梯踩錯腳PK啦！哈哈！

Bobby：你仲好意思講，嗰次唔係你笑聲震天，都唔會全個商場啲人都知道啦！個個望過嚟，我不知幾尷尬！

兄弟同心良性競爭

當年三個後生仔，不為上位明爭暗鬥、互篤背脊，反而兄弟同心，衝勁十足，連收工都約埋歎咖啡度戲。

Bobby：我哋兄弟雖然貪玩，不過工作就很團結，每拍完都會去附近茶餐廳傾吓戲，每個人心態都好好、好Fit！我都有問監製（鄧特希）點解搵我哋這班二線演員演出，佢話搵一線演員可能戲份會集中一個人身上，但係全班都係二線，就可造出良性競爭！

阿公：我都發現一個現象，我哋兄弟不止有監製計算嘅效果，就連互相交惡、爭戲情況都冇，感情之好，仲可以合作五輯都冇變，實在好難得。要是其他劇，大家演員長時間對住，好多都會有爭拗！

Bobby：所以我好期待《皇庭》長拍長有，仲要搞多啲聚會……

陶：我哋呢班爛玩兄弟已踏入人生另一階段，時至今日要再走埋一齊，相信監製都要諗一啲「新口味」配合至得！

Personal Note: Love "The File of Justice"! :D Didn't know that all of Michael's bow ties in the series were his own! :P

Ha ha.... Bobby and Felix loved watching Michael and Flora's kiss scene...the scene that they were referring to should be the famous 'squeezing orange juice' metaphor! :P

Ha ha.... Bobby mentioned Esther's talking-while-kissing scenario again! :P

Too bad these interviews don't have video clips...would definitely be funnier watching them interact! :D

*Credits to orientaldaily