吳卓羲：第一日已係情侶
吳卓羲與徐子珊雖被傳拍拖，但各自的緋聞不相伯仲，分分鐘比演出還要精彩！兩人不避嫌互笠高帽打情罵俏，默契十足的他們每次合作都非常舒服，原來子珊參選港姐時已與卓羲拍檔跳舞，難怪男方說：「第一日已經係情侶啦！」
徐：徐子珊
吳：吳卓羲
不避嫌互笠高帽
卓羲與子珊合作無間，兩人均認為對方好戲，不避嫌地互笠高帽。
徐：2004年我參選港姐，公司安排咗你同我拍檔跳舞，不過你當時好忙，冇咩時間去排，大家冇咩偈傾，但就有提醒你啲舞步，你知我哋比賽好緊張，咪捉住你練多幾次囉！
吳：我仲記得係跳社交舞，得幾個Step，你仲幫我記埋，然後話我知呢個動作係咁、咁會靚啲，但到真正認識係05年拍《突圍行動》。
徐：同你係第一次合作，第一套劇係《女人唔易做》，客串就之前都有。
吳：咁期間都有留意你，你注定食呢行飯，演員要好明白導演要啲咩，講幾次你就知，畀到要求。
徐：其實我都仲係適應緊，幾困難架！頭幾年拍嘢好迷惑，但你就好易帶動到對手。
吳：咁都見你慢慢進步，出嚟拍戲自然就OK，最緊要係真情流露去表達自己。
徐：同你拍過咁多套劇，你覺得邊套最開心？
吳：《團圓》啦，因為一開始已經係拍拖。
徐：呢部確實又係幾舒服，好少戲一開始就一齊，同你又熟，演對手戲機會多啲。劇情入面係講誤會，有好多戲要去演，要了解多啲，好似了解朋友咁，就係更加無奈，哈哈哈！其實同你一齊拍都好開心同舒服，咁我係咪你合作過最舒服嘅對手？
吳：你坐喺我隔籬當然係最舒服啦！講真喺公司入面，你同我合作比率係最多，默契自然有晒，直頭第一日已經係情侶啦！
徐：我成日畀你影響到，每一次都唔知你講啲咩，就帶我去遊花園！同你拍成日畀你影響，唔知我自己做緊咩！
吳：係鬼，你啲感情戲不知幾叻！
徐：因為驚你阻住我收工，你試吓唔係同一部劇會點！好多時做嘢最Close嘅係會舒服啲，唔使時間揣摩，演員之間化學作用要時間培養，最緊要觀眾受落，依家都有Job係搵我哋一齊做，特輯都特登Book我哋一條線。
互數緋聞得啖笑
提到緋聞，子珊與卓羲絕對叮噹馬頭，就讓他們逐一細訴。
吳：我呢方面不嬲都勁，根本就係一個緋聞表！邊單最好笑？馬賽囉！直頭冇聯絡，係唔會發生嘅一個緋聞發生咗！可以點？咪當宣傳囉！不過我合作過都有冇傳過嘅，就係容祖兒，連雜誌都冇寫過，江若琳好似都冇。
徐：我都唔係好多緋聞男友啫！送車？都係緋聞，所有都假，非常假！好似高鈞賢咁，因為當時係同一個經理人，都係當宣傳，所以咩都有……是非。開始會唔開心，驚影響工作、fans同觀眾會點諗，好介意同上心。但係久而久之覺得影響工作好無謂，依家就冇咩所謂，有時係有唔公平，離晒譜咁。
吳：邊單咁過分先？
徐：咪就係話我畀人包囉！真係好唔開心，當時我作出回應係最強烈，因為太過分，對我人格操守同名譽好影響！平時拍劇大家明係咩一回事，但我唔接受呢樣嘢，我亦唔會咁做！
吳：其實係某雜誌覺得我哋尷尬，我就覺得傳過都可以合照，大方啲仲好。咁你呢？當年同黎明好似都傳過吓，點嘅啫？
徐：拍廣告囉！當時啱啱入行仲係港姐，仲傳黎生送部車畀我添！
吳：嘩！一個廣告就有部車？
徐：係有錢收，車呢啲嘢可以供嘅啫！嗰時面對黎生，我係好崇拜嗰種，會覺得距離好遠，因為由細到大都見到嘅偶像人物，好似好虛無咁，有得合作就覺得好玄。其實佢又冇乜嘢，佢會教你同埋同你傾偈，你唔會想像到佢講嘢係好高深，咁正常傾偈都有。（唔反問番佢？）冇，真係好深，佢本身個人好有魅力，好有地位，但講嘢深大家唔明白啫。
吳：空肚食早餐……哈哈！可能我哋IQ低，咁你之後有冇見過黎生？
徐：做嘢見到都有Say Hi，冇問題架！
子珊電癦最迷人
子珊於大眾眼中有一雙殺死人的電眼，那卓羲又可會認同？
吳：我覺得你有一粒電……癦，所以平時唔係望住你視線，係望住你粒癦，呢粒癦係帶動我要去望你所有嘢！
徐：我唔覺得，成日覺得自己好男仔頭。其實我唔係好了解自己，好迷失，又慢熱，唔知點Carry自己，係識好耐嘅朋友會話番畀我知，我係點嘅。
吳：我不嬲覺得你好Lady，愈來愈女仔，又有味道。記得拍《學警雄心》你係男仔頭。依家睇落去就……Wow……你睇嗰雙電眼，直頭迷死人。
徐：我自己都唔知嘅，真係架？
吳：做嘢係會裝到好強，人哋就覺得你男仔頭，但你對住熟嘅人有嗲同女仔一面，係好事。做嘢係要有自己形象，咁你本身係女仔，唔好玩健身呀。同你拍咗好多部劇，又成日一齊做嘢，睇到你同熟嘅工作人員、同事，係有自己一面。
願為家庭棄事業
雖然卓羲與子珊都熱愛演藝工作，但花無百日紅，兩人亦有想過其他出路。
徐：有冇諗過畀幾多年時間自己？中間有冇心灰意冷想離開？
吳：點解我唔會做呢行？咁我留喺公司一世都未必會要我啦！甘草有好多都冇做，可能好值租喎！又可能我會做關於製作上嘅嘢，做攝影師都唔出奇。
徐：今時今日我都享受演戲，鍾意表演，你叫我突然唔做會好痛苦，暫時未有諗。以前做到攰都會唔開心，但未至於要走。如果唔做呢行，我諗做番學生係我夢想，又或者睇吓會唔會嫁，遇到個好嘅男仔閃婚都ＯＫ，我願意為家庭放棄事業。
吳：呢個年代嘅女仔係會，想要個幸福家庭多過事業，好虛浮。
徐：家庭好緊要，將來我會尊重另一半，希望係可以家庭時間多啲。人愈大愈發覺家庭重要性，因為無論點都會喺背後支持你。
吳：咁你會唔會生小朋友？
徐：我冇諗喎！
吳：我會生，但有冇啲唔喊嘅ＢＢ？身邊好多朋友生晒，睇到佢哋無奈而又幸福，自己都會攝高枕頭諗，到時自己結婚會唔會生呢？家姐個女一路大，見佢真係又無奈又煩。不過有ＢＢ係開心啲，我以前唔會鍾意，但依家就改變咗，唯一唔接受就係唔可以大肚結婚，同埋想生女先。
徐子珊與吳卓羲老友鬼鬼，坐大髀情深對望亦不怕再惹閒言閒語。
吳卓羲坦言視徐子珊是好兄弟，日後亦會不避嫌繼續約對方食飯。
子珊經常笑吳卓羲愛做無聊事，其實是想搞氣氛。
吳卓羲承認馬賽是好女仔，但不是他杯茶。
子珊出道初期曾與黎明傳緋聞。
--------------------
August 14, 2011
黃宗澤口甜舌滑喪玩子珊
徐子珊唔只外表Cool到爆，原來性格也男仔頭十足，開工愛踢人字拖，平民指數極高，不過卻因而引來老友黃宗澤「垂青」，不時聯同一眾猛男玩弄她，單憑口技已贏足十條街，縱使貴為港姐出身，美貌與智慧並重，但子珊仍毫無招架之力，惟有安於當眾人的歡樂小姐，認真慘情！
演情侶激咀唔尷尬
徐：徐子珊
黃：黃宗澤
黃：第一次同你拍劇，應該係05年嘅民初劇《千謊百計》，嗰時睇見你好慘，都已經日拍夜拍，仲要開埋電影《跟蹤》，記得《千》劇你個角色好難做，成日要崩潰，有少少黐線，又有喊嘅場口，不過你又喊唔出，我就走埋嚟鬧你，問你知唔知阻住我收工，快啲啦，其實你知我係幫你嘅。
徐：多謝你囉！咁辛苦咁難演嘅角色，有個好對手差好遠，你除咗喺戲入面成日幫我，戲外都有教我演戲嘅嘢。
黃：我都叫做演咗幾年戲，有時你好似唔知點handle，唔敢講教，係多啲經驗啫！
徐：呢啲咪係前輩囉！之後同你有一大段時間冇合作，中間都有一齊去啲Annual Dinner、Sales Present跳舞。
黃：嗰段時間係我哋兩個最慘之時，因為拍劇拍得好犀利，個人好攰，啲嘢又冇時間排，排兩次就話上台，其實嗰時好忟，心諗你想我做到啲乜嘢呢？依家好啲，睇化晒，唔知你覺唔覺，以前我有唔妥嘅嘢會出聲。
徐：我發覺個個年輕時都會咁。
黃：個心有團火嘛！不過依家團火熄咗！
徐：其實係放咗喺其他地方，會變得識去控制。記得同你合作《情人眼裏高一D》，有感情線，同阮小儀、王祖藍仲玩到癲，題材又輕鬆，最近我哋又喺劇集《潛行狙擊》演情侶，你覺得我有乜轉變？
黃：我覺得同你性格有相似地方。
徐：通常啲人唔會鍾意啲同你似嘅人，我第一日開工都比你哋遲咗一個月，因為拍緊第二套劇，記唔記得我問過你點解一定要搵我，同時孭兩套劇好辛苦，我會好唔開心，唔想拖累你哋，唔想令角色出嚟唔好。
黃：我都有同你講呢個角色除咗你，冇乜邊個可以handle。
徐：你嗰刻好似好抬舉我咁。
角色不作他選
黃：同你同grade嘅人，放邊個落去都唔似，我都有諗過，楊怡唔似，唔好講入面性格，個角色係同你外形襯。你又唔係好小家碧玉樣，係型嗰隻，寸少少樣又得，呢個角色係需要咁，鍾嘉欣亦唔襯，陳法拉都得嘅，不過佢都係同一劇組，胡杏兒都唔似個角色人物。
徐：拍完之後你覺得係唔係呀？
黃：咁你又記唔記得，拍之前有同你講，我會係野獸咁對你。
徐：嗰時你講到好激動o架。
黃：我話會扯你頭髮同咬你，唔係一般情侶嗰啲錫錫。
徐：我當時都驚驚哋話唔係嘛，咁收劇本嗰時都知，我都問監製點解要搵我。
黃：都冇乜嘢，見你入組後好快pick up到。
徐：咁對手都好重要，要好熟先得，因為第2、3集已經係激情戲。
黃：你諗吓喺荒郊野嶺劈劈吓友，都要打個茄輪先。
徐：仲要兩個喺元朗拍咗成日濕笠笠。
黃：朝早9點幾畀人劈，最後去到大草原，你係女仔都出晒汗啦，仲要坐喺山頭打茄輪，好彩同你熟，又當你係男仔。
徐：起碼唔使尷尬，磨合時間少，好彩我同人哋女友好熟（此時黃欲拿餐牌看，徐立刻閃避），嘩，我真係好驚，哈哈!起碼知人哋唔會嬲先，（有冇同人哋女友備案？）又覺得唔需要咁做，大家都係工作會明白。
黃：我冇打你，都係整蠱你之嘛，驚乜。
踢人字拖開工有苦衷
徐：由第1日入劇組開始，你哋令我好有歸屬感囉！
黃：唔好話我，謝天華同有啲玩得嘅導演，都係矛頭指向你，不過大家都係講笑，唔會郁手郁腳，可能你性格玩得同男仔頭啲，又真係冇乜點當你係女仔，我一同天華夾埋你就死梗。
徐：你哋唔使郁，淨係講嘢都頂唔順。
黃：你最多咪話哎吔，你哋好煩。
徐：你哋成日言語輕薄我，戲中我仲要着貼身衫、短裙高踭鞋。
黃：成個性感OL咁，唔整蠱你整邊個呀？日日開廿幾個鐘喎！
徐：我成為眾人嘅娛樂，係歡樂小姐，負責派禮物。
黃：連導演都整蠱你嘅時候，你自己好好諗吓！
徐：對住幾十個男人好尷尬，本身同天華都熟，你哋成日叫我周圍走，兩邊擺，好恐怖，我都唔知點，好慘架！成兩個月都係咁。
黃：你返工嗰個樣仲男仔過啲男仔，踢人字拖，我都唔明點解，究竟你係咪女嚟架？
徐：咩呀，王菲都係踢拖o架！
黃：但你踢拖同人哋踢拖唔同嘛！
徐：咁你即係話我冇氣質啫，我都有着牛仔褲o架！
黃：行入廠個勢又似男仔。
徐：你成日話我粗魯。
黃：可能我貪靚啦，我都有襯吓先出門口，你真係T shirt、牛仔褲、踢對拖鞋咁。
徐：我又真係好casual，你知唔知點解我着人字拖？因為開工着高踭鞋，如果着波鞋會有襪印，我為個角色有苦衷o架！
黃：你仲要着4、5、6吋嗰啲高踭鞋添！
徐：咁你高嘛!我知對手係你，專登去買襯番你架！不得不承認我係男仔啲，已經盡量扮女仔嘞。
黃：咁你啲性格喺呢行係好，男、女仔都得，咪可以食幾瓣囉！
徐：嘩！多謝你呀！
黃：平時冇拍劇我哋少聯絡，係呢行通病，我自己成日見嘅朋友唔多，來來去去都係同一班，不過唔係呢行。拍完戲感情都依然在，但唔係成日見啫，我同天華唔會一星期約出來食飯一次，不過一見面又會癲晒咁。
演技是生活經驗累積
徐：同你都係公仔箱出嚟拍戲、出唱片，你覺得邊樣令你好有興趣？
黃：畀我揀會鍾意演戲，有時諗嘢覺得冇乜自己性格，但又覺得享受，啲朋友成日問我近排係咪唔開心，其實我唔係，只係投入咗角色。
徐：同你一齊拍嘢好開心，就連梳頭阿姐都話你把口係最甜，我覺得我呢方面唔似你，因為我唔識氹人。
黃：我唔知咁係咪好事，拍嘢大家開心氣氛會好，會選擇講好嘅嘢，衰嘢唔講，我宗旨係你冇責任受我氣，除非我出糧畀你，或者你做咗啲好錯嘅嘢。
徐：你喺呢個圈咁多年，有冇出現過失意嘅時候？
黃：又冇乜，就算唔開心又好快搞得掂，慶幸一做嘢可以將所有嘢放埋一邊，麻醉自己諗其他嘢。
徐：我都係，唔開心情緒唔會延續好耐，開心就好忘我，會喺角色度發洩，笑同喊都放盡啲，所以幾enjoy呢個忘我境界。
黃：拍戲有幾樣嘢幫到，試過有日上堂有啲壓力，望住鏡見到自己笑，係開心笑嗰隻，睇報道話做運動可以忘記唔開心，咁我咪跳吓舞、拍吓劇、踩吓單車囉！
徐：大家都演過咁多套劇，你有冇邊套係唔想睇番？哈哈哈哈，我就唔敢講，開頭喺電視度睇番自己好尷尬，唔知點咁！
黃：演技係生活經驗累積，當人愈大睇番之前演嘅戲，會覺得做乜嗰時會咁，好醜樣。
徐：你今年出唔出碟？
黃：係有計劃，不過唔知出唔出到，因為基本上我都冇停過做嘢。
徐：作為演員拍咀戲實唔少得，咁你有個圈內女友，會唔會有阻礙呢？
黃：從來我都冇呢啲嘢，一演戲就遇神殺神，唔好搞我，其實我幾享受與唔同嘅人合作，因為會畀到唔同元素自己。
徐：咁我畀咩元素你？
黃：就係點玩你囉，不過你都唔算易恰，間中都有還擊嘅。
黃宗澤不時聯同一班猛男整蠱徐子珊。
子珊與黃宗澤拍《千謊百計》時，撐艇仔談情。
謝天華（右起）、陳法拉、徐子珊與黃宗澤在《潛》劇合作愉快。
黃宗澤笑子珊是男仔頭。
子珊自言開心時會投入忘我境界。
子珊與黃宗澤拍親熱戲，唔使備案。
--------------------
August 21, 2011
阿田晒金句子珊當明燈
徐子珊與田蕊妮年齡雖然只差兩載，但入行時間卻相距10年之多，面對人生閱歷豐富的阿田，子珊自然視對方為學習對象，更不時以筆記下對方的金句，失意之時作為推動力；除了工作，已為人妻的阿田也大談自己的「幸福史」作為子珊愛情路上的「明燈」，更大爆兩口子的相處技巧：無所不談，就連糞便形狀亦照講可也，愛得認真坦蕩蕩！
瘋狂玩牌開展友誼
田：當年同你拍劇集《少年四大名捕》，雖然係冇對手戲，但喺大陸外景同你住對面房，就係咁搭上咗！記得嗰時好凍，你竟然連羽絨都唔帶。
徐：徐子珊
田：田蕊妮
徐：第一次出外景，咩都唔識嘛！
田：真係好離譜，好在我呢啲師奶仔出埠做足準備，係咁借暖包同羽絨畀你。不過你畀我印象好好，唔使開工會喺房睇碟，《兩生花》嗰啲，仲叫埋我一齊睇，不停研究，我覺得你對做戲好有熱誠。
徐：其實大家性格幾似，都係男仔頭。不過你成日話我對自己有誤解，又話我唔係男仔頭……（記者：吳卓羲都話你有內在女人味！）
田：佢原來已經嗅到你內在嗰度喇？都話你哋有嘢啦，扮晒嘢！
徐：我都嗅到你內在o架！
田：唔出奇吖，我哋咁親密，估唔到卓羲都嗅到。
徐：好攞命呀！諗起嗰次Trip真係玩到癲，臨走都玩鬥地主，鬥到呢……
鬥地主 玩死自己
田：我哋就係嗰次學識鬥地主，哈哈！
徐：成班後生真係好好玩，輸咗有罰o架！嗰次同你、陳鍵鋒三個人玩，輸咗要打電話去玩人，結果我輸咗要打去某同事間房度，問佢要唔要服務……
田：我記得呀！好在佢瞓緊覺唔知咩事囉。
徐：當晚唔知點解得我輸，畀你哋玩到好慘！另一個就係要敲房門，嗰時係半夜，對象係鍵鋒助手，結果佢只係着底褲開門，都不知幾尷尬呀。
抄下啟發性言論
田：雖然之後冇合作過，但大家都間唔中會出來睇戲、食飯同睇騷，又會有學術性探討，近排就探討人生哲理……
徐：記得跟你聽個喇嘛講talk，聽完令人平和啲，冇咁執着同煩惱。
田：你對工作好緊張，成日畀好多壓力自己，咁大家傾下偈，輕鬆吓囉！
徐：我對住你成日會drop notes，因為可以寫低再慢慢嘴嚼。記得有次你講「演戲要認真，但唔好緊張」，無錯，呢個係一線之差，因為緊張就享受唔到過程。你對我好有啟發，我發覺你經常性好開心，想喺你身邊感染點去to be happy。
老公係我最好朋友
徐：你話以前唔敢講嘢，但見你做主持又幾放喎！
田：《超級巨聲2》我當係練習，當時個監製搵我做，但《巨1》已經好多是非，無論主持、參賽者都好多萬箭穿心，係一個充滿批評嘅節目。我因為驚唔想做，返到屋企老公好認真望住我講，話我一世人喺山洞唔係辦法，做戲以外就唔夠膽去試係唔會有進步，仲叫我去面對，嗰刻我覺得佢好Man，決定試下！橫掂錄影可以剪輯嘛，最後娛樂到觀眾都開心。
徐：咁你咁忙，又拍劇又主持，點生Baby？
田：係好充實，依家未有呢個諗法。如果生B係為開心，依家我夠，咁唔需要，但我同老公都有傾過嘅。
徐：你哋兩個好sweet，係好離譜，你老公唔使出Trip，你就返工死都唔揸車，要老公喺元朗揸車載你返將軍澳，放工又等老公唔知喺邊度出嚟接，然後兩口子食飯，呢啲就係Spend Time Together，日日見未必係最好，但搵到方法去溝通相處就好難得。
田：係o架！你好似好羨慕咁。
維繫夫妻感情妙法
徐：你係我好朋友外，仲係我學習對象，點解你講嘢我聽得咁清楚，因為我睇到你身邊每方面都處理得好好，當然有鬧人時候啦，其餘亦有好多嘢值得我去借鏡同學習。咁你兩公婆平時點維繫感情？
田：人生都係一個旅程，既然參加咗旅行團，咪開開心心玩咗佢囉，老公係我最好嘅朋友，我就係佢最好嘅傾訴對象，咩咩狗屎垃圾都講，老公屙唔出屎都會同我講，話題會牽涉到啲屎靚唔靚添，我覺得冇問題，坦蕩蕩，其實有乜嘢未見過，佢係我最信任嘅人，如果喺老公面前都要戴面具就好悲哀。
信佛變開心豁達
徐：人哋成日話圈中伴侶難啲維繫感情，你同老公會唔會因小事嗌交，成個鑊飛埋去嗰隻？
田：有時都會嗌，好正常。印象入面以前成日嗌，近兩三年好少，試過好激烈，因我哋唔係柔弱嘅人，口快過個腦，有咩唔啱直接講出嚟，通常都係老公讓我，有時會覺得係畀佢寵壞，喺佢保護下成長。
徐：咁你都幾幸福喎！
田：老公都有話我做人有時唔好咁惡，世界唔只老公同屋企人。我好感恩可以遇到佢，依家大家少咗鬧交，可能信咗佛啦。以前啲人見到我話我好寸，其實係自己唔敢講嘢，入咗行覺得自己係一碌葛，咩都唔識，咁不如少講少錯，起碼唔會畀人笑，結果因為咁封住自己，冇晒自信。
學懂慢活 享受人生
徐：咁後來點樣先令你有轉變？
田：我信咗佛3、4年，係道理令我知道，我以前可能好介意人點睇我，其實控制唔到，我都想好似王菲同張曼玉咁，於是自然就迷失自我，唔知快樂喺邊，係信仰令我有勇氣面對自己。
徐：你啱啱講嘅，我有7、8成經歷過同經歷緊，我都經常好loss，人不斷成長，睇番轉頭係跌跌碰碰，不過依然行緊，所以好多嘢唔好睇太重。
田：咁你loss嘅時候點算？
徐：好loss都要繼續返工，個心好空，靈魂唔知去咗邊，咁出嚟嘅嘢都唔會好，個樣又唔靚。人冇自信時愈會表現得好勝，因為我25歲先入行，已經冇咩時間，對所有嘢都會緊張，好多人話我唔識講笑，依家好啲，唔介意畀真正嘅自己人哋睇。
田：人每分每秒都改變緊，根本冇一個係自己，所以要相信同享受每一刻，就會開心同豁達。我都要學「慢活」一啲，以前同一時間會轉好多想法，依家就會做完一樣先一樣。
阿田（右）和子珊歲數只相差兩年，關係亦師亦友，難怪如此投契！
阿田和子珊乜都玩一餐，訪問期間笑聲不絕。
子珊和阿田因拍《少年四大名捕》而結緣。
子珊和阿田在訪問中大談愛情觀及兩性相處之道。
阿田與杜汶澤結婚後，兩口子的甜蜜有增無減。
--------------------
August 28, 2011
小儀子珊甘做小女人
有人喜愛把港女與公主病畫上等號，加上本地女多男少比例下，要找到心儀對象甚有難度，有見及此，於愛情路上儼如乾旱沙漠的徐子珊與阮小儀，同聲認為當小女人有着數。不過演過無數感情戲的子珊，堅拒與圈中人談戀愛，直言感覺戲味很濃；小儀則呼籲時下女性不要為結婚而結婚，免到頭來後悔莫及！
徐：徐子珊
阮：阮小儀
開咪放笑彈 氹人開心
阮：你知唔知我哋電台好多男仔嗒你糖，一聽到你個名就話正，森美都話欣賞你，私下亦有讚過你，你有個性感icon，每個男仔都會畀你迷倒。
徐：冇啲咁嘅事。
阮：你其實都幾有特性，TVB藝員好有星味難接觸，你係唯一一個唔係，歌手同電影都得，我唔當你係藝員，雖然你係性感，但認識你時就係好男仔頭好爽，親民又冇架子。
徐：你真係好funny，咁你都好好玩，好少見你唔開心，都知呢個係職業需要，你同森美嘅角色要氹人開心，我識嘅你其實係一個artist、藝術者，只不過將自己某一方面嘅嘢沉鬱咗！
阮：邊個八畀你知？
徐：你同森美on air時好嘈，off咪就好靜，因為已經將啲energy放晒出嚟。
阮：有時人大咗會攰，把聲唔同咗，以前我可以好高音，但已經笑到壞咗，行街食飯唔係幾講嘢，啲人會以為我唔開心，但我唔可能24小時都咁情緒高漲，有機會都會休息吓。
徐：成日聽你電台嘅節目，覺得你好開心、王祖藍都曾經話我有潛質演喜劇，但冇人搵囉，就算做喜劇都係演serious角色，同公司講過又冇人理，其實我某部分可以好豁出去。
阮：記得有次有個舞台劇，森美扮奶奶，講嘢好有鄉音，你夠膽死成個訪問同我哋一齊講鄉音。
徐：嗰次真係好好玩，睇番feedback，都話原來我幾好笑，好有滿足感，大家終於發掘到我另一面。
中女不可悲勿為嫁而嫁
當電台主持腦筋當然轉數快，不過於男生面前，小儀卻搖身一變成小女人……
阮：我喺男仔面前係小女人，感情上樂意咁做。以前會忟男友，但經歷過之後，就覺得小女人有着數，我又唔會打男仔，只會哦哦，不停反轉一個問題去問，真係要改。
徐：喺感情上我都係小女人，可能覺得自己係小朋友性格，乜都唔理，唔識得為人設想，以前會覺得梗係對方就我，唔係要我講呀，最好你自己諗到啦，明明問對方想去邊度食，其實自己諗好咗，係有呢啲通病，大個就覺得呢種關係唔健康，真係要溝通。
阮：我都覺得大家拎出嚟講係好事，我有年幾冇拖拍，覺得date緊有啲位好易變成朋友，本身有一堆異性朋友，開始當然希望兩個人一齊，但到咁上下對方就會問你有冇單身女仔介紹。
想搵個老外拍拖
徐：平時工作已經好忙，感情事冇心力去博，唔可以再用幾年時間去培養，好難承受，我唔可以好似正常情侶咁拖手食飯，都好少男仔可以接受，所以我想揀圈外人，如果遇到個啱嘅對象，我唔介意出街食飯畀人影，不過對方介意呢。試過幾次date，對方想送我返屋企，我話唔使，因為驚有狗仔跟。之前有周刊騷擾我家人都會心痛，何況係對方屋企人，人哋未必鍾意，所以我諗住搵老外。
阮：我認為唔好為結婚而結婚，我哋呢啲中女，今時今日唔係可悲o架！呢個年紀有男人錫自己，可以拍拖就拍拖，應該好好享受。為結婚而結婚，身邊太多呢啲例子，順其自然，以前我有set咗25歲結婚添。
徐：我15歲就開始同阿媽講，唔結婚唔生仔，唔係一紙婚書嘅問題，而係關乎一個家庭。
阮：要睇人囉！大家認真相處去生活，緊要過搵一個老公結婚，咁會影響人生，離婚嘅人心理會有陰影，有朋友離婚帶住個小朋友，會覺得冇男人會鍾意，其實唔可以咁諗。
徐：如果將來對象係圈內人我更加唔得，因為件事太過戲劇性，我演戲易投入角色，都信唔過自己，好容易諗到呢樣嘢。
難忍男友拍咀戲
阮：真係畀你搵到呢個人，會點做？
徐：如果搵到段關係係長久，我會選擇離開娛樂圈，係為咗捍衞同呢個男人嘅將來，因為成日演感情戲，知道大家可以拎幾多嘢出嚟，但到真正嘅時候，會覺得呢句對白咁熟嘅，咪係表情A，好容易覺得係咁，會唔舒服，同埋我唔能夠接受男友同其他演員咀，最好唔好啦。
阮：我接受到，要對自己有信心嘛！近排見你畀人影相抱住個小朋友，覺得你會係個好媽媽。
徐：我可以o架……呢種感覺都係近年嘅事，家姐生BB後令我對小朋友都識照顧，有時阿媽行開幾個鐘我都幫到手。咁你會唔會生？
阮：你睇我個臀部咁大就知會啦！但我都係睇對方有冇需要，呢個年代好多人覺得養寵物足夠，媽咪又冇壓力畀我，所以有機會生就生。
細粒係賣點想過選港姐
身形對女性來說尤其重要，個子不高的小儀也曾為此感不快……
阮：以前讀書時會介意，但入行之後發覺原來呢樣嘢可以係自己賣點，大家諗細粒女仔嘅時候就會諗起我，都幾好，有時會諗因為自己形象得到呢份工作，唔係一定香港小姐腳長先吃香，太多呢啲靚女，總有啲搞笑角色。
徐：我唔係走靚女路線。
阮：公司要你走嘛！有人同我講最緊要唔好介意，咁望吓鏡就知係二打六咪安於本分，細個有諗參加香港小姐，話晒我個樣唔差，做唔到冠軍，第3名cute cute地，我自問都OK，嗰個年代會代表香港去日本參賽，冇諗入娛樂圈。
徐：最後你做乜冇參加？去咗電台開咪做節目？
阮：我細個聽收音機，好鍾意林珊珊，因為佢聲靚，都有人話我把聲似佢，曾經選過商台DJ，但落選……不過我都算好彩，後來又迂迴曲折咁成功咗。
小儀（右）與子珊齊作愛的呼喚，願意做小女人，讓人愛。
小儀原來也想過好似子珊一樣去選美。
子珊與小儀分享開心事。
子珊希望找個圈外男友，享受正常的拍拖滋味。
小儀在電台開咪，將歡樂帶給聽眾。
*Credits to orientaldaily
No comments:
Post a Comment