深情快語 陳豪 Single Available Man女人十個有九個視他為Mr.Right，受眾層面很廣，十幾歲的學生妹、寫字樓的妙齡白領、四五十歲的屋企師奶一網打盡。聽說陳豪有份參演的電視劇集，九成收視達30點以上。還未算，令一眾小生恨得牙癢癢的，除了收視，還有他在四年間電暈四代花旦，由蔡少芬到陳慧珊到郭羨妮再到最近的廖碧兒，命中率極高，位位一聽到「陳豪」二字也眉開眼笑。聽說，連TVB女高層曾勵珍都對他另眼相看，特別關顧。
「唔好諗得我太完美。」 好男人可能是，你永遠唔知佢背後搞乜。
陳豪說，他從來不是萬人迷，也不是Mr.Right。提起廖碧兒、陳慧珊，34歲的陳豪似足怕醜仔尷尷尬尬，臉部表情似在求饒：你放過我啦！不願講戀情，陳豪寧願自嘲，把話題扯開去。「如果我企o係一百個男人入面，你一定唔會睇到我，靚仔過我大把啦。」
現 在的陳豪是《胭脂水粉》文質彬彬的祝家大少；《心花放》那個嬉皮笑臉的三弟；還有《火舞黃沙》裏撲火救人的大英雄宋東昇。就算扮流氓，都是流氓英雄。舊事 重提未必有人信，陳豪從前在影圈，獲派的角色不是黑社會就是爛仔，連他自己也沒有想過有機會從良。「以前冇人夠膽搵我做好人，邪牌就有我份。」陳豪強調自
己並非靚仔，實情６呎高的他贏的正正是外形，誰知一聽又搖頭抗議，「在影圈撈得最霉時，我想入電視台由低做起，TVB的高層珍姐起初也不肯簽我。」由爛仔到萬人迷的奮鬥史，有淚有汗。
在澳洲讀大學主修會計，94年放暑假回港做兼職Model，拍廣告行天橋，賺的是Easy Money。外形高大英俊，浸過鹹水的番書仔是一夥耀目新星，那時陳可辛監製的《晚九朝五》找他Casting，陳豪試鏡成功演出其中一角。處男電影一來就有情慾床戲，因為有Talking Point，一下子成了影壇新貴。由Model轉型做電影明星，虛名來得
很快。
《晚九朝五》後，陳豪也搶手過一段時間，連續半年有三、四套戲在身，加上做Model的酬勞，高峰期一個月賺十萬。「拍完《晚九朝五》，被傳媒捧到天上有地下無，開始睇唔起身邊的人，給人讚幾句演技幾好就飄飄然，心想『仲唔到我拎金像獎男主角？』。」
少年得志，生活過得很奢侈，「試過吃一頓晚飯，頭盤是o駕車到山頂食生蠔，主菜是鯉魚門的游水海鮮，然後再到酒店吃甜品、喝咖啡，搵到錢你自然識得 Fing。」影壇新貴的路從來不易走，拍了三十多部電影，由主角變配角，再變三四線閒角，最後淪落到客串過鏡，戲內是沒有名字的差人甲、爛仔乙。拍了一大堆連片名也記不
起的爛片，漸漸也沒有人再記得陳豪是誰。「試過最『長』的對白是『大佬，電話！』，那套戲叫《濠江風雲》。」
在導演心目中，陳豪從來是面目模糊的蒲友。「記得有個導演跟我說：『你成日想做忠，做忠有乜好喎，做奸先有得發揮，做番你自己嘛。』我不能怪人，那時在我身邊穿穿插插的，的而且確全都是『公仔人』（紋身漢）。」
捱窮 出 道兩年後，找他開工的電話愈來愈少，「為了生活，我乜角色都接，咪傾價錢囉，出得起錢我就拍。」陳豪每次收到片酬便儲起一半，以便不時之需，就算幾個月冇 戲，都不怕銀行戶口有出冇入。「我由細到大未捱過窮，咁大個人才知道生活迫人，最窮的時候，要每天計算使費，三日不可用超過二百元，試過銀包只剩下一百 蚊。」
那時很多三、四線影星也轉行了，陳豪也試過轉行賣濾水器，嚇得朋友不敢接他電話，「那份工有底薪，每個月幾千元吧，但我幾個月也開不到單，自己唔辭職都等炒啦，做了半年就劈炮。「還好，山窮水盡時有導演找我客串，雖然戲份好少，但那時賺得幾千得幾千。」
陳豪說，半年沒工開的日子，最怕遇上記者，「有戲拍比較好，沒工開零收入時，是怕記者又追問：『你之後開咩戲呀？』我真係唔知仲有冇工開，例牌答案是：休息一排先啦。」他說，電影圈的好處是錢賺得快，壞處是沒有安全感。「在影圈，又不致於霉到冇得撈，搵三餐勉強OK，但我想Show俾人睇陳豪是有實力的，於是我搵人幫手搭路入TVB。」在影圈做過主角，入電視台由低做起，他並不介意。「在電視台磨練一下，人才會硬淨起來。」
從良 自薦入TVB，第一步是託當時的經理人許愿搭路，找藝員部的大家姐曾勵珍（戲劇分部副總監）關照，誰知珍姐對陳豪沒有好感，不屑跟他見面。「我覺得自己外形唔算差，又做過Model，點知在珍姐眼中，我原來咁唔討好。」陳豪說他一日做爛仔，一世都是爛仔，「你叫我點洗底？」
珍姐看不順眼的，是陳豪那把沙啞的嗓子，粗獷得像黑社會。「慢慢改，唔得改都得。」陳豪找醫生做聲帶手術，又努力增肥，為了令樣子看起來隨和一點，最後把一頭金髮染黑。「我執正了之後，她派了個ICAC的《廉政先峰》單元劇給我演，過了那一關，才正式接拍《妙手仁心Ⅱ》的醫生MC這個角色。」
陳豪很珍惜這個得來不易的機會，《妙手仁心Ⅱ》監製戚其義原本安排了一個警察的角色給他，輾轉間MC這個角色才落在他手中。在有幾千名員工的大機構TVB 工 作，陳豪很快就明白一個道理。「你要知道這間公司不停生產劇集，亦即是不停為藝員創造機會，今日我博到一個機會，做得好自然陸續有來。」不再沉醉於電影的 刀光劍影，陳豪由二打六爛仔、衰差佬做到專業人士，「脫胎換骨是有點艱苦經營，但之後都是靠付出努力，拍《洛神》監製放曹丕給我做，觀眾反應幾好；到拍 《絕世好爸》發覺原來我都可以搞笑，繼續放角色給我，其實每次都是博一博。」
女人 陳豪粗略估計他一年可以拍到一百一十集劇，這是極限。在電視台，忙與受歡迎從來都劃上等號，陳豪一年拍四劇，換來了知名度，也賺了觀眾緣。「最難忘是02 年 台慶那晚，我得到『飛躍進步男藝員』獎。」那一年，大熱倒灶的是與六嬸方逸華有親戚關係的林峰。有觀眾緣，陳豪也很有女人緣。戀愛紀錄包括蔡少芬、陳慧珊、郭羨妮及廖碧兒。坊間傳聞，每個跟陳豪合作的女演員，絕少不過電，「不是不是，是以前不會避忌，男男女女都玩得埋。」陳豪說，出了那麼多緋聞他也有反 省過，某程度上要負上責任。
「唔 好話幕前，就算係幕後都傳過緋聞，連我從前的經理人也不放過，最搞笑是幾年前把我的女助手寫成豬扒，佢嬲死我。」陳豪很不願談緋聞，連現階段有沒有拍拖都 不肯講，「你說我以前不介意公開有女友？是的，因為那時我唔覺得自己有新聞價值，亦唔會有人關心我有冇拖拍，現在一傳出緋聞就被寫得好負面。」陳豪怕傳緋聞，但又不介意同廖碧兒手拖手行騷。「廣告商給你一大堆錢想你這樣做，在商言商，都是客人要求的。」情侶檔搵錢是實際需要，現實裏的廖小姐也不如你我想像中幸福，「我是一個好普通的男人，唔好諗得我太好，浪漫？No，其實我幾懶，不過都算專一。結婚？遲早會結但唔係o易家囉。同我拍拖，唔好帶任何期望，平常心最好，我未必會令女友開心，或者我會做好多衰o野都未定。
*Credits to 3weekly
No comments:
Post a Comment