July 10, 2011
陳敏之胡杏兒閨密戀事
感情事對女性來說絕對重要，不過並非人人願意坦蕩蕩與眾分享，陳敏之與胡杏兒這對閨中好友，性格各異卻互補不足，相識8年來無所不談，爽朗的敏之談起男友 時毫不忸怩，細說對方從避忌偷拍，到隨時Ready成拍攝對象的轉變，相反杏兒一提起黃宗澤三個字即不懂反應，更直認對方是其死穴，夠晒搞笑！
陳：陳敏之 胡：胡杏兒
由NG建立的友誼
陳：記唔記得我哋第一次合作係《下一站彩虹》呀？當時我第一次孭重戲，仲要做奸角，你就係純良女生，我哋好多對手戲，成日鬧交架！
胡：記得！就係咁混熟咗，嗰時你仲有個花名叫「敏豬」，哈哈，好豬囉！
陳：其實初初有啲驚你，你經驗多過我，我就成日NG，好在你有時都會喺廠陪我傾個角色應該點去，慢慢大家就建立友誼，雖然我哋唔係成日見，但都keep到。
胡：我個人好講feel，對方係唔係真誠，傾幾句偈就知道有冇交個心出嚟。你就一啲機心都冇，好容易接近，完全係傻婆……同埋你知我好多秘密，如果爆咗出嚟我就知係你漏口風喇，嘻嘻。
生日派對有「驚喜」
陳：我好記得有年生日，你同助手畀咗個好大驚喜我！
胡：係喎！嗰年你個派對主題係化裝舞會，我咪同助手去石板街揀衫，咁啱嗰排興哥斯拉（與日本超人為敵的怪獸），結果我咪喺條街度着住去囉，哈哈！
陳：你真係好夠雷，人哋個個上嚟先換，你就同埋助手一齊癲，仲有你又教我呢個電腦白癡上網買衫，差啲連自己信用卡號碼都填埋落去呀！
胡：信得過你嘛！就算天大秘密，感情事都一齊分享啦！
天涯海角的承諾
胡：其實我覺得好似你呢類乜都share到嘅朋友唔需要太多，幾個就夠。我記得有次發生咗件事令我好唔開心，即刻急call陳美詩、伍姑娘（伍詠薇）同你出嚟講一輪，喊晒之後就舒服得多……講樣嘢你知，我心入面一直同自己講，你第時去邊度結婚，我都一定會做你姊妹。
陳：我好想喊呀！咁你結婚我都要做姊妹架！
胡：如果我第時結婚，我會想大家一齊開心，搞到好似台慶咁盛大，識得嘅都會請，記者都要。但講到感情事，我就覺得你好幸福囉！
陳：嘻嘻，我訓練到男友警覺性好高，以前佢好介意畀人偷拍，影得幾次就變咗佢似藝人多啲，着過嘅衫唔再着，又噴香水，仲話要修甲同做facial！有時我出街好求其，佢就話畀人影到好肉酸囉！
結得婚就一生一世
胡：我係天蠍座，呢個星座嘅女仔好專一，認定咗就會付出，我好佩服啲人拍拖唔使見囉，我唔可以架！
陳：咁你有冇諗過結婚？
胡：有，不過可能細細個父母就離婚，影響我覺得婚姻好兒戲，所以廿幾歲時覺得自己唔會結婚。
陳：未搵到真命天子咩？
胡：我要搵到一個對我從一而終、唔會同我離婚、一生一世嘅男人。如果我對追我嘅人冇feel會即刻stop。（記者問：唔係認咗同黃宗澤拍拖咩？）唔係，我有身邊朋友錫就得，佢哋會祝福我。（睇嚟黃宗澤三個字就係你死穴！）係吖！
陳：以前話唔會結婚，咁咩事令你心態變咗？
胡：可能同年紀有關，過咗30歲就要諗吓！
陳：你講過事業行先，就算有男友都只係排第二，咁你係咪想等到事業有成先再諗感情事？
胡：咁我依家都未算好成功，視后係我目標之一，亦想試多啲電影方面發展，唔想太多緋聞。我承認係工作狂，如果有能力，我唔介意做到好似汪明荃咁。
後記
當年以小室哲哉徒弟身份入行的陳敏之，不經不覺已於娛樂圈打滾多年，期間遇上不少知心友，就如身旁的好姊妹杏兒。點好姊妹法？好似小記向敏之套料：「既然你哋咁close，雙方男友都唔會冇見過啦！」醒目的敏之即說：「咁耐以嚟我見過佢一個男朋友，就係鍾麗淇依家個老公囉！（咁黃宗澤呢？）哈哈……」杏兒則只在旁笑而不語，這種默契得來不易啊！
杏兒（左）與敏之自拍劇「搭上」後，成為無所不談的好姊妹，感情要好得令人羨慕。
敏之的長腿令她早前在劇中有「索腿天后」之稱。
全力闖一番事業的杏兒，對感情事十分避忌，不欲多談。
--------------------
July 17, 2011
楊怡陳敏之顧家女包袱難除
女性要撐起成頭家絕對不易，為給予家人有更好的生活，即使累也不得不繼續撐下去……陳敏之與楊怡兩個30出頭的單身女子，不約而同有着家庭負擔，面對娛樂圈日以繼夜機械式工作，曾想過向水銀燈生活說不，但清醒過後，發覺原來已泥足深陷，揮之不去！
陳：陳敏之 楊：楊怡
同病相憐窩心姊妹
楊：拍劇集《衛斯理》之前同你唔係好熟，當時只知呢個高妹係楊明女朋友，我本身同楊明係訓練班同學，又當佢係半個細佬，知佢對感情唔乖，好花弗，但我就唔buy呢樣，後來同你傾偈知你唔開心，傾傾吓就開始熟。
陳：之後唔使講，同陳山聰、姚嘉妮、伍詠薇聚會都會出嚟，聖誕節、生日、結婚周年……大家玩得好癲，無所不談，好多嘢心照。
楊：我就少啲，因為唔鍾意周圍去，工作太忙，其實又唔使成日見，我比較鍾意講電話同send message。
陳：最大感覺係上年我病，覺得同你又拉近咗，咁啱你又唔舒服，真係同病相憐，病完之後睇嘢好似化咗，更加珍惜朋友。
生病時往往是最脆弱、最需要朋友關心……
楊：點解會突然留意你？雖然唔係成日打畀你，但有次睇節目見你個樣好腫，好多人講你變樣，又冇精神，愈講愈恐怖，有日終於忍唔住漏夜send短訊問你咩事，話我自己都有啲唔舒服，兩姊妹唔怕講，當時你唔肯講，只係話喺醫院，我個心都沉一下，但覺得始終私人嘢，你想講就講，唔敢問，入得醫院都應該唔小事，我都有段時間入醫院，所以畀你冷靜吓！
陳：記得出院之後你哋嚟屋企探我，我都有講我發生咩事，唔係出面講嗰啲，但呢次就好大感覺，覺得女仔唔可以咁搏，要愛惜身體，你都係，劇接劇冇停過，身體都唔係咁好，女仔要向自己幸福進發，做嘢可以做，但要畀時間休息。
楊：我哋成8年冇合作，最近又可以喺《回到三國》一齊拍，好開心，其實我哋一班朋友入面，嘉嘉（姚嘉妮）同伍姑娘（伍詠薇）感覺就似走喺前面嘅尖端，因為一齊傾偈我永遠會笑遲啲，你哋講嘢轉數快，係要有一個人係咁，如果成堆人係咁會好嘈。
陳：雖然我哋都好嘈，但聚埋一齊就大件事，乜嘢都八一餐。
楊：你覺唔覺病係最令人有感覺？
陳：絕對係，我冇諗過你係最照顧我嗰個，嗰次病你打畀我問我想食乜嘢，其實你又唔得閒，搞到好似男朋友咁，令我好窩心，就認定咗呢個姊妹有咩都兩肋插刀。
楊：我仲記得我哋幫嘉嘉做姊妹好開心，一齊陪喊好感動，個個都問幾時到你呀？
陳：諗吓我哋呢班邊個結婚生仔都好開心，因為太多經歷，呢10年各自各忙，但個心聯繫住，有時會掛住對方，好似你之前喉嚨沙晒，我會肉痛，可能我病你都感受到，對住醫院四面牆好無助，我哋呢啲中女係咁。
遇啱就結婚生子
楊：係中級以上嘅靚女先啱。
陳：你表面好強，入面好脆弱，又易病，要錫住自己，你有冇諗過做到幾多歲？有冇為未來打算？
楊：希望有一日，呢份職業可以成為我興趣嘅終身職業，唔係靠搵食嘅職業，依家搏殺期不停做，係想搵多啲錢，如果有一日結咗婚就唔係咁，有時都有問自己，如果唔做呢行可以做乜，其實真係諗唔到，都冇一個計劃。
陳：做生意囉！之前唔係同家姐做過咩？
楊：係家姐做，我負責畀錢，冇參與過，我想畀佢有寄託，家姐結咗婚又有BB，呢行唔係佢終身職業，希望佢有其他嘅事業。我都望有一日遇到個可以結婚生仔嘅人，但唔會唔做，想有得揀，選擇拍唔拍呢套劇，因為終有一日會畀人叫我做媽咪，宣萱都喺微博話畀人叫媽咪，死啦！我喺《鐵馬尋橋》有五個仔女添！
陳：依家媽咪年輕化，畀謝安琪整後生咗！做戲都會易啲，我話你知有仔女都唔出奇，唔覺得肉酸。
楊：對我哋嚟講係好事，容易接受自己畀人叫阿媽。
失意低落諗過轉行
當人生遇上失意之時，就自然萌生放棄念頭……
陳：我病嗰時有諗過轉行做生意，因為真係好醜樣，腫晒，會諗咁辛苦做乜，但係好番之後，又會諗暫時我搵唔到一份職業可以有呢個錢同時間，又有滿足感。
楊：我試過喊住打畀經理人話我唔撈嘞！咩事？個人好攰，病緊人就軟弱，覺得好似做咁耐係得到好多，但同時間都失去好多，見到人哋喺街咁自由，有時我想透啖氣都覺得好渾濁。
陳：幾時嘅事？
楊：唔記得，上次病都有一吓覺得崩潰，因為好多嘢控制唔到，唔係驚自己做唔到呢行，係驚冇錢畀屋企，收入少咗，變咗佢哋生活突然有問題，冇可能呢一刻同媽咪講要降低，會覺得好對佢唔住。
陳：咪即係同我一樣，真係陰功。
楊：我知道佢一啲都唔會介意，但我介意，因為媽咪冇做嘢。
陳：我有時諗結咗婚生埋仔冇嘢做架嘛，畀唔番呢啲嘢媽咪會唔開心。
楊：咁你有老公嘛！
陳：當你病嗰時就會有十萬個為甚麼，點都擔心。
楊：冇病過等於你冇跌過，個人唔會識大，唔會識得珍惜自己嘅嘢，會覺得係天經地義。
唔慣追訪做番自己
人在高處當然感覺飄飄然，但某程度上也漸漸逼自己入死角……
楊：《宮心計》嗰段時間好多人去討論、追捧，識我嘅人知我唔難相處，但呢個時候我就會有啲劣根性問題出現，會同你死撐，成為傳媒敵人，我唔鍾意佢哋跟，會衝動到令自己走入死角，好狼狽，但即刻豁出去唔理，我唔鍾意妥協就唔會妥協。
其實轉頭去睇，以前嘅自己從未畀人咁講過，嗰刻我follow唔到自己，照顧唔到咁多鏡頭，會出現自己唔鍾意嘅情緒，有少少覺得有乜好跟，想做番自己，當然知道你有新聞價值，人哋先跟你，做咁耐都係為呢樣嘢，但原來我發覺係唔慣，所以都係做好自己，其他就希望搵到更加多嘅錢。
陳：你真係要顧住身體囉！
楊：身體真係差過以前好多，錢係冇一個界定要幾多，實唔夠，但身上有幾多才華就想用到盡，做好佢，冇得我哋say no，公司、出面不斷安排機會畀你，你say no咪好折墮！
楊怡（右）與陳敏之同是孭起家庭擔子的孝順女，體會甚深，十分投緣。
姐姐楊卓娜（左）開時裝店時，楊怡（右起）與好友伍詠薇、陳敏之、姚嘉妮撐場。
陳敏之（左起）、楊明與楊怡曾合作《衛斯理》。
兩人舉杯互祝身體健康。
做藝人有得亦有失，楊怡在生病時意志消沉，想過退出。
--------------------
July 27, 2011
法拉幸福宣言：生夠兩個
女人終極目標是找個好歸宿，若然入得廚房又出得廳堂，於另一半心中定必加分，陳敏之眼中，煮得一手好菜的陳法拉絕對是筍盤，感情生活美滿幸福的法拉已計劃好將來，生兩個小朋友，並以一生的精力培育他們。
之：陳敏之 拉：陳法拉
初來甫到 貓癡結緣
之：當年你選完華姐加入無綫，我哋同一經理人，不過你人生路不熟，屋企人又唔喺香港，所以經理人叫我照顧嚇你，我仲記得攞過啲衫畀你添！
拉：係呀，因為我喺美國成日着背心、短褲同拖鞋，你就話藝人唔可以咁。
之：其實我哋唔係好多時合作，不過你好好，會記得一啲細微嘢，知道我鍾意邊隻牌子Lip Gloss，咁啱你有個牌子贊助，就特登留番支畀我，好窩心。
拉：哈哈！朋友有時唔使成日見，我同你有共同話題，就係一樣都鍾意貓，如果要我形容自己一定唔係街貓，雖然大家都好Tough同獨立，咁街貓會惡、出抓，我就鍾意喺屋企（外冷內熱？）都係，好多人覺得我比較冷，其實如果啱Key就好熱情。
全能煮婦 專心湊仔
之：你畀我感覺係個好老婆，煮嘢食好叻，又成日鑽研，真係好爆，無啦啦凌晨時分整Pizza。
拉：哈哈哈，咁半夜冇得出去食飯，有時凌晨3、4點收工返屋企好肚餓，就會周圍搵嘢食，當雪櫃乜都冇，就會去櫃度搵食材，咁平日我好鍾意買定，好似日本麵粉之類，有時加隻雞蛋就可以整架嘞！
之：咁你點識？睇書定係搵人教？
拉：有買書學，媽咪都係煮嘢食好叻，我細細個就跟媽咪切嘢（最叻係煮咩？）紅燒牛肉麵，由燉到炆都係自己搞，整到啲肉夠腍，麵嘅質感要啱啱好，仲有撈埋汁，好多朋友食過都話我可以開舖頭，咁西餐我都識得煮嘅。
之：真係入得廚房，出得廳堂喎！搵日真係要去你屋企食飯，學嚇點做好老婆，你真係好全能。
拉：其實好簡單，不過Pizza我都係學緊整層皮，未Fing到，屋企嘅焗爐又細又唔夠熱，所以整唔到個批上面乾下面脆。
之：你會唔會生小朋友？
拉：會，我鍾意小朋友，不過呢個責任太大，要好有心機，係一門好深學問，當年媽咪湊大我都用咗好多精力，雖然我係獨女，但將來我就想生兩個，因為兩個會好玩啲，一個就比較靜。
維繫感情 絕不容易
之：啲人成日話陳豪係筍盤，我覺得你都係女性筍盤之一，都冇乜邊幾個嘞！
拉：我都好耐冇Update過你啲感情事，係咪仲係嗰個先？
之：係吖！咪又係以前嗰個囉！幾開心，你呢？
拉：我都係咁樣啦！
之：覺唔覺做藝人維繫感情比普通人難？我就覺得係囉！
拉：都會，不過依家我唔會介意出面點評論，只要自己兩個人心知就得，冇咩受影響，不過拍拖出街，又或者去沙灘行嚇就冇咁自由，真係要去外國旅行囉！香港Privacy會少啲。
之：我男朋友由唔慣，到依家適應曬畀人影，某程度佢似藝人多過我。
拉：出街食飯畀人影又冇咩嘢，都影過幾次，同藝人拍拖食飯，做藝人嗰個一定係背住坐，截的士永遠唔係藝人，如果女方係藝人會好啲，相反女方係圈外人，就會尷尬啲。
之：你男朋友都算係半個圈中人，對慣鏡頭會唔會好啲？
拉：其實佢都唔習慣，因為佢比較怕醜係一個靜人，突然有部相機對住佢影會好緊張。
之：香港太有壓迫感，唔會喺街拖手，要拖就喺屋企拖囉！
拉：依家科技太發達，有時手機影咗你相都唔知，好似喺街拍戲，轉頭喺網上已經見到。
娛圈複雜 難得知心
之：我覺得你係聰明女，永遠都係做自己嘢，唔會埋堆，又唔會隨波逐流，好啱做娛樂圈，因為呢個圈都幾複雜，可以話個個都係你朋友，但未必個個真心對你。
拉：初初我唔識粗口，係聽你講囉！你份人好直，我唔識廣東話你又教我。
之：咁我唔識國語你都有教我點發音啦！互相幫忙啫！可以做到朋友係一種緣分，朋友可以好多，但真心嘅幾個就夠，呢幾年我睇住你愈來愈好，人又開心，講廣東話成個香港人咁，真係進步好多。
敏之（右）和法拉感情深厚，是圈中難得的好姊妹。
和男友薛世恆沐浴在幸福中的法拉，已計劃好生兒育女。
陳敏之大讚法拉廚藝了得，能俘虜男人心。
陳法拉當年參選華姐加入無綫，喜獲陳敏之提點照顧。
陳法拉大嘆藝人拍拖成焦點，沒安全感。
敏之承認感情穩定，男友已習慣被傳媒拍照。
--------------------
July 31, 2011
馬國明認冧敏之：我養你
馬國明算是公仔箱中數一數二的乖乖仔，不愛夜蒲，實屬宅男一名，最愛的卡通人物是唐老鴨。第一個帶返家「見家長」的圈中異性為陳敏之，嚇得雙親以為囝囝墮愛河，馬國明直言曾心動過，惟當時事業未成不敢發動攻勢，可惜現時敏之已名花有主，自嘲難與對方男友鬥！
陳敏之：陳 馬國明：馬
陳：喺劇集《下一站彩虹》你做我男友，當時我嘅螢幕初吻畀咗你。
馬：不過我唔係喎！呢套劇之前已經冇咗……你畀我感覺係靚囉！因為我鍾意長腿，講真架！
陳：乜你唔係鍾意細粒女仔咩？
馬：都唔係嘅，我都鍾意長腿，（緋聞女友胡定欣條腿好靚？）定欣條腿唔靚，哈哈！咁你份人好有義氣，咪靚囉！又肯幫朋友，幫過我添！
陳：你講邊次先？
馬：好多時一齊做嘢，你會幫對手安排晒啲嘢，記得有次返內地登台，我本身電話冇漫遊，你就即刻幫我打電話搞好晒，以前我返內地冇人搵到我，你成日鬧我……你咁細心，絕對係一個好老婆。
冇潮物 太老套
陳：都幾架！我唔係對個個都係咁，多謝晒喎！
馬：同你都係合作過兩三套劇，咁私下都係好朋友，有時你架車有問題，有嘢唔識又會問我，我就請教你女仔嘢，自己本身比較粗心大意，雖然唔係成日見，但大家都有共同話題，有時我睇到你做啲戲，都會同你講做成點。
陳：嗰次喺去機場嘅45分鐘車程整好晒，中間都多波折，你話地球人點解會有漫遊，話冇人搵喎，真係好好笑，咁我都開心幫你整咗，放心，你對得我多會愈來愈似我。
馬：我份人真係太老套，連被喻為潮物嘅iPhone都冇。
陳：唉，算啦！唔可以一步登天，咁喺你心目中，我係咪好女仔先？
馬：絕對係啦！你一個人撐起成頭家，之前拍《公主嫁到》又整親條頸，咁辛苦做又冇咩怨言，見到你咁我都好心痛，又要一個女仔買樓，叫咗你唔好做，話我養你架！
陳：你同好多女仔都咁講，咁先慘呢！
馬：冤枉，我真係冇同女仔講過，嚴格來講只得你咋。
義氣仔 超筍盤
陳：係咩？咁你都好有義氣，你記唔記得有次我話冇錢買車，問你可唔可以借錢畀我，咁你話養我嘛，都要買畀我架啦！點知你真係好認真，其實我講笑玩吓，話我冇錢，叫你借幾十萬畀我買車，你初時仲叫我唔好玩，後來以為係真就想即刻畀錢我，聽到真係好窩心，好想喊，絕對係最勁筍盤，（打低陳豪？）分分鐘有得揮，你有車都搭港鐵，可能慳油啩！
馬：我屋企落銅鑼灣，搭港鐵方便好多，我個人好實際，所以係好老公一名。
陳：以前我成日屈你送嘢，好似生日咁，唔係物質問題，我記得你送好多Winnie the Pooh畀我，我到今時今日都包得好好，好珍貴架！咁我都有送過嘢畀你，好似你架車嗰隻老虎吊飾。
馬：哈哈，嗰時你同我講，話黑色車好蝦人揸，隻老虎紅紅橙橙，放喺車上面鎮住佢，咁so far到依家一直冇事吖！仲有我返內地拍劇，你驚我悶，就送咗隻老虎公仔畀我，依家都仲放喺我床頭。
揀女友要過阿媽嗰關
陳：其實想問你好耐，點解你仲唔拍拖？
馬：未遇到嘛！太忙嘞！呢套劇啲時間好緊，每日瞓得兩個鐘。
陳：係咪未搵到一個女仔可以令你付出，我發覺你都應該唔係好識拍拖嗰類人！
馬：都可以咁講，咁耐以嚟我只拍過3、4次，真係好悶，淨係識踢波。
陳：我就好活躍，所以唔可以同你一齊。
馬：我都好鍾意喺屋企。
陳：你喺屋企要同我玩，要扮低能喎！
馬：我都玩公仔架！鍾意唐老鴨，你咪玩Winnie the Pooh囉，都OK架！其實我有對你心動過，真係……因為你真係好好，只不過嗰時唔敢追，因為自己未搞掂，賺幾多錢大家知，屋企都未有，爸爸退咗休，仲點諗拍拖，我係嗰種拍拖會諗將來嘅人。
陳：要到結得婚先會追我？
馬：依家好難鬥啦！你都有男朋友。
陳：我分手就打畀你，我驚我分手時你已經拍拖，你對感情太慢熱，又唔可以逼，所以你要一個樂天女友，最大問題一定要你媽咪鍾意。
馬：你咪都係一樣。
陳：因為你放媽咪第一位，我係愛咗先算，比較反叛，如果媽咪覺得麻麻地，我就會叫佢唔好理，但你唔係囉！
馬：都係嘅，最老套嗰句啦！老婆有得揀，阿媽冇得揀，我阿媽本身好開通，如果我阿媽都覺得唔得，就真係有問題嘞！
「甩拖就同你結婚」
陳：咁耐以嚟應該得我見過你阿媽，因為我上過你屋企，嗰次係活動之後一齊去睇戲。
馬：咁你嗰時做完活動個妝好濃，咪上我度落妝先去睇囉！
陳：記得上到去，當時你阿媽、阿爸同家姐表現得好驚訝，我話我嚟借洗手間，但有樣嘢好笑，就係我出番廁所，見到你阿爸睇緊報紙，但份報紙就掉轉咗，好明顯係扮睇，我真係想笑，但死忍。單憑咁樣就證明你唔係成日帶女仔返屋企啦！
馬：咁講真，你應該都係第一個，我都唔帶女仔返屋企嘅。
陳：可能你阿媽以為我同你拍拖，哈哈！你阿媽喺你心目中真係好重要，拍《下》劇時你個散紙包係隻龜，我話好肉酸，問你可唔可以換過第二個，你好緊張話唔得，因為係媽咪買畀你，你當隻龜係真咁養，點知幾年後你仲用緊，手錶又係一樣，孝順到呢……如果我下次分手，要盡快同你結婚，因為我已經冇時間生，點幫你生啲唐老鴨出嚟！
唔做呢行去踢波
陳：你最近畀我感覺係成日撩女仔，係咪個人豁達咗？
馬：咁我同前輩拍劇，佢哋教我唔只淨係演好自己角色，係要令現場拍攝氣氛都要開心，出嚟嘅嘢先會好，所以依家我會讚啲女演員係靚女囉！
陳：我有時拍劇諗唔到點做，會帶埋劇本叫你幫我睇，公司裏面冇第二個可以咁。
馬：掉轉頭我遇到同樣問題，你都會幫我，好似我演花弗角色，都會問你有冇呢啲朋友，大家互相幫助。
陳：起碼大家有經歷，做到朋友好難得。
馬：有感覺我哋係永遠嘅朋友。
陳：依家你又做男主角，我覺得好開心。當年你攞獎（飛躍進步男藝員）嗰陣時我差啲喊，癲咗咁！眼淚係咁流，我嗰刻都好想攬住你大嗌，但驚畀人打，相信掉轉頭你都會，大家叫做捱咗咁耐，你都係早我一年半載，睇住你咁勁，我好開心，好多人鍾意你。
陳：你做呢行會唔會一世，有冇諗過唔做呢行做咩？
馬：又未試過好心灰意冷，我都算係幸運嗰類，做過「路人甲乙丙」3年，到今時今日都好鍾意做戲，唔做咪去踢波囉！不過搵唔到食，可能娶咗你呢！
陳敏之已名花有主，馬國明唔敢發動攻勢。
敏之笑言若甩拖，會投向馬國明懷抱。
敏之曾上馬國明屋企，被其家人誤為女友。
*Credits to orientaldaily
